હમારી અધૂરી કહાની: સાચે જ અધૂરી

            એક સમય હતો જ્યારે ફિલ્મમાં જેટલો મેલોડ્રામા વધારે એટલી જ ફિલ્મ લોકોને પસંદ આવે પણ સમય સાથે માણસો, ટેસ્ટ અને સ્વભાવ બધું જ બદલાતું ગયું અને લોકો વેવલાવેડાને બદલે ઠોસ હકીકત પર જીવવા લાગ્યા. સત્યને સ્વીકારવાની અને જોવાની હિંમત તેમનામાં આવી અને એટલે જ કોમર્સિયલ ફિલ્મ બને તો પણ જેટલું શક્ય હોય તેટલું લોજિક બેસાડવામાં આવવા લાગ્યું અને એથી પણ ઉપર જો ખોટું અધધ લાગે તેવું જોવું છે તો પણ સાઉથ સ્ટાઇલની ફિલ્મ્સ ગમવા લાગી. હવે જ્યારે આ પ્રકારનો જમાનો આવી ગયો હોય ત્યારે માત્ર અને માત્ર ત્યાગ પર ફિલ્મ લખવાની હિંમત તો મહેશ ભટ્ટ જ કરી શકે. હદ બહારના ઇમોશનલ સિન્સ ક્રીએટ કરીને લોકોને પ્રેમ વેવલો લાગે ત્યાં સુધી ખેંચી જવાની કોશિશ માટે માનવું જ પડે સાચે જ આ ફિલ્મ અધૂરી છે...

            મોહિત સુરી માટે ભટ્ટ કૅમ્પ ખૂબ જ લક્કી રહ્યા છે. ભટ્ટ કૅમ્પ જોઈન કરવા પાછળ તેમની એક ડિગ્રી ઘણી હતી કે તેઓ મહેશ ભટ્ટના ભત્રીજા છે. જો કે મોહિતે સીધુ જ ફિલ્મ ડિરેક્શન નથી કર્યું પણ આસિસ્ટન્ટ શીપ કરીને તેમણે શરૂઆત કરી છે. વિક્રમ ભટ્ટની ફિલ્મ ’કસૂર’થી ફિલ્મ ક્ષેત્રે પગ પેસારો કર્યો. આ પછી તેમણે  ’આવારા પાગલ દિવાના’, ’ઝહર’, ’ફૂટપાથ’ જેવી ફિલ્મ્સ આસિસ્ટ કર્યા પછી પોતાના સ્વતંત્ર ડિરેક્શનમાં મહેશ ભટ્ટ પ્રોડક્શનની જ ’કલયુગ’ ૨૦૦૫માં ડિરેક્ટ કરી. ફિલ્મ મ્યુઝિકને હિસાબે વધારે ચાલી પણ યશ તો ડિરેક્ટરને જ મળે. આ પછી  ’રાઝ મીસ્ટ્રી કન્ટીન્યુસ’, ’કૃક ઇટ્સ ગૂડ ટુ બી બેડ’, ’મર્ડર 2’ અને આ પછીની ’આશિકી 2’ પછી તો મોહિતને તો માનવા પડે એવા ડિરેક્ટર ગણાવવા લાગ્યા. આ પછીની તેમની ફિલ્મ ’એક વિલન’ મારી દ્રષ્ટિએ સારી ન હતી પણ કોમર્સિયલ એંગલથી હીટ રહી. તેમની ભટ્ટ કૅમ્પ બહારની પહેલી ફિલ્મ હતી અને હવે આ ફરી વિશેષ ફિલ્મ્સના બૅનર હેઠળની ફિલ્મ પણ સારા ડિરેક્ટર હોવા છતા પણ વાત બહુ ખરાબ હોવાથી જમાવી ન શક્યા....

            વિશેષ ફિલ્મ્સ અને ફોક્સ સ્ટાર સ્ટૂડિયોએ ત્રણ ફિલ્મનો કરાર કર્યો છે. જેમાં સરસ મઝાની ફિલ્મ ’સીટી લાઇટ્સ’ આવી અને આ બીજી ફિલ્મ રીલીઝ થઈ રહી છે.’મી. એક્સ’ રીલીઝ થઈ ગઈ છે. આમ તો નવેમ્બર ૨૦૧૩માં જ આ ફિલ્મ રીલીઝ કરવાનો પ્લાન હતો પણ ઑક્ટોબર ૨૦૧૪ સુધી ઇમરાનના પુત્રની બિમારીને લીધે પાછળ લઈ જવામાં આવી. મોહિત સુરીએ કહ્યું હતું કે ફિલ્મમાં ફીટ થવા માટે વિદ્યા બાલને વજન ઉતારવું પડશે અને એ વાતને લઈને અફવા ઊડી કે વિદ્યાએ ફિલ્મ છોડી દીધું છે જેના સ્થાને શ્રદ્ધા કપૂરને લેવામાં આવી છે પણ એક ઇન્ટર્વ્યૂમાં મહેશ ભટ્ટે ખુલાસો કર્યો કે વિદ્યા બાલન હજુ પણ ઇન જ છે અને ફિલ્મ ૧૨ જૂન, ૨૦૧૫ના રોજ રીલીઝ થશે. આમ તો અડધું ફિલ્મ સાઉથ આફ્રિકા કેપ્ટ ટાઉનમાં શૂટ થશે એવું નક્કી થયું હતું પણ શેડ્યૂલ જેમ ડીલે થતું ગયું એમ લોકેશન્સ પણ બદલાતા ગયા. પહેલું શેડ્યૂલ કલકત્તા પછી ૧૫ દિવસ માટે દુબઈના અલગ અલગ જગ્યા પર કરવામાં આવ્યું. ૪ દિવસ સાઉથ આફ્રિકા કેપ્ટ ટાઉનમાં અને છેલ્લે મુંબઈમાં ફિલ્મ પૂરુ કરવામાં આવ્યું. શૂટ દરમિયાન ઘણા વિધ્નો આવ્યા પણ આખરે ૧૫ જાન્યુઆરી, ૨૦૧૫માં ફિલ્મનું શેડ્યૂલ પૂર્ણ થયું છે એવું ડીક્લેર થયું...

            ઇમરાનની ભલે કીસીંગ બોયની ઇમેજ ધરાવતો હોય પણ ઇમરાન માત્ર અને માત્ર ડિરેક્ટરનો જ એક્ટર છે. એકદમ સામાન્ય રોલ પણ કરી શકે અને ’શાંઘાઈ’ જેવો રોલ હોય તો પણ ઇમરાન ફીટ જ હોય. આમ જુઓ તો ૨૦૦૩માં ’ફૂટપાથ’માં નાના રોલ સાથે શરૂ થયેલી તેની કેરિયર ગણીએ તો કુલ ૧૨ વર્ષનો અનુભવ ઓછો તો ન જ ગણાય. આરવ રૂપારેલના પાત્રમાં ઇમરાન છે અને આથી વધારે ખરાબ રોલમાં મેં ઇમરાનને ક્યારેય નથી જોયો. તેના ફિલ્મમાં બતાવેલા પ્રેમ પર દયાને બદલે ઘૃણા આવે છે. વિદ્યા બાલન અત્યારે તો અતિ સુખી પરિવારની હોવાને લીધે વજન કંટ્રોલ ન કરી શકે પણ એક્ટીંગ તો કરી જ શકે. ફિલ્મ ઇન્ડસ્ટ્રીમાં પ્રવેશ પહેલા વિદ્યા ઘણી હેરાન થઈ છે. સાઉથની ફિલ્મ્સમાં ઘણા પ્રયત્નોને અંતે આખરે ૨૦૦૫માં તેને પહેલી ફિલ્મ ’પરિણીતા’ મળી. ’હમ પાંચ’ જેવી સિરિયલ અને ’સર્ફ એક્સેલ’ જેવી એડમાં કામ કરી ચૂકેલી વિદ્યા માટે ફિલ્મ બહુ જ સારી સાબિત થઈ. વિદ્યા પ્રથમ ફિલ્મ પછી ક્યારેય અટકી નથી અને એક થી એક ચડે એવા રોલ નિભાવીને પોતાની જાતને સાબિત કરી ચૂકી છે. બસ માત્ર પોતાનું વજન કાબુમાં રાખે એટલે ઘણું! આ ફિલ્મમાં વસુધા પ્રસાદ તરીકે વિદ્યાને જોઈને એક ફીલીંગ તો આવી કે બંને પાત્રો સામે તેની ઉમર રીતસર ચાડી ખાય છે પણ આ વાત વિદ્યાને કેમ નહીં સમજાતી હોય! રાજકુમાર રાઓ એટલે અદભૂત એક્ટર. એફ.ટી.આઇ.આઇ.નો ગ્રેજ્યૂએટ રાજકુમાર ઘણા પ્રયત્નોના અંતે પોતાની પહેલી ફિલ્મ ૨૦૧૦માં ’લવ-સેક્સ ઔર ધોકા’ મેળવી શક્યો હતો. આ પછી રાજકુમાર એક ચોઇસનો એક્ટર બની ગયો. એક પછી એક ફિલ્મ સાથે તેની પરિપક્વતા વધતી ગઈ. આ ફિલ્મમાં વિદ્યાના પતિ હરીના પાત્રમાં ખૂબ જ નાનો રોલ છે પણ ખૂબ સારી રીતે નિભાવ્યો છે. મધુરિમા તુલી અવનીના પાત્રમાં છે. મધુરીમાની કેરિયરની શરૂઆત સીધી જ ફિલ્મથી થઈ હતી. ૨૦૦૪માં તેની પહેલી ફિલ્મ ’સત્તા’ હતી પણ ૨૦૦૭થી ફિલ્મમાં ખાસ કામ નહીં મળતા સિરિયલ જગત તરફ વળી ગઈ. ’કસ્તુરી’, ’શ્રી’, ’ઝાંસી કી રાની’ અને અત્યારની ’કુમકુમ કા ભાગ્ય’ ખૂબ સફળતાથી ચાલતી રહી છે. ફિલ્મ પણ સાથે કરતી જ રહી છે પણ કોઈ પ્રખ્યાત કહી શકાય તેવી નહીં. સારા ખાન પણ ટેલિવિઝનની દુનિયામાં સિરિયલ્સ ઉપરાંત રીયાલીટી શો દ્વારા જ જાણીતી બની છે. સારાને પણ ફિલ્મ્સ મળી જ છે પણ જાણીતી નહીં. નંબરની રીતે ગણીએ તો આ તેની ત્રીજી ફિલ્મ છે અને આ ફિલ્મમાં નાઈલા તરીકેના પાત્રમાં છે. સાઉથની અમલા ઘણા સમય પછી ઇમરાનની માતાના પાત્રમાં જોવા મળ્યા. એક્ટીંગ માટે બધાએ મહેનત કરી છે પણ...

            મહેશ ભટ્ટ અને મુકેશ ભટ્ટે મળીને ફિલ્મ પ્રોડ્યૂસર કર્યું છે. ફિલ્મની વાર્તા પણ મહેશ ભટ્ટે જ લખી છે. સાંભળવા મળ્યું છે કે મહેશ ભટ્ટના પોતાના જ ઘેર તેમણે તેમના પિતા અને સ્ટેપ માતા સાથે જોયેલા પ્રસંગો પરથી વાર્તા લખી છે. બોલીવુડના સદાય વખાણ કરવા ટેવાયેલા લોકોએ તો એવું કહ્યું કે પૂરા ૪૦ વર્ષ પછી મહેશ ભટ્ટ તરફથી આવી વાર્તા આવી છે અને અત્યાર સુધી ન જોઈ હોય એવી ફિલ્મ બની છે ડાયલૉગ શગુફ્તા રફીકે લખ્યા છે. બૅકગ્રાઉન્ડ સ્કોર રાજુ સિંઘનો છે જ્યારે ગીતો મીથુન, જીત ગાંગુલી અને અમી મિશ્રાએ કંપોઝ કર્યા છે પણ એ વાત અલગ છે કે રાહ્ત સાહેબનું ’તેરી આંખો કા દરિયા’ સીધુ જ ઉપાડવામાં આવ્યું છે કેમ કે આ ગીતને યુટ્યુબ પર અત્યાર સુધીમાં લગભગ ૪ કરોડ હીટ મળી ચૂકી છે. વિશ્નુ રાવની સિનેમેટોગ્રાફી છે. પ્રોડક્શન કંપનીની ક્રેડિટ વિશેષ ફિલ્મ્સને આપવામાં આવી છે. ફિલ્મ ૧૩૧ મીનીટનો રન ટાઇમ ધરાવે છે. ટીમના દરેક વ્યક્તિની મહેનત માટે ફિલ્મને ૨ સ્ટાર આપીશું...

પેકઅપ:

"પુરુષો એટલાં વિવેકી હોય છે કે ૪૦ વર્ષની સ્ત્રી પણ સુંદર લાગે છે અને સ્ત્રીઓ એટલી ખરાબ હોય છે કે ૩૦ વર્ષના પુરુષને પણ અંકલ કહે છે"

દિલ ધડકને દો: દિલ ધડકને લગા

            ફિલ્મ માટે સ્ટોરી મહત્વની છે જ પણ જો ફિલ્મ સર્જક મહાન હોય તો નાના નાના પ્રસંગોને પણ લાગણીઓ સાથે જોડીને એક ઉત્તમ સર્જન બહાર લાવી જ શકે. આ પ્રસંગો બહાર આવે સ્ક્રીનપ્લે અને ડાયલૉગથી અને એથી પણ ઉપર હોય તો ડિરેક્શનથી. ઝોયાને આ ફિલ્મ લખવા અને ફિલ્મને છેક સુધી લાગણીઓ સાથે જોડી રાખવા માટે દિલ ખોલીને અભિનંદન આપવા જ પડે. ફિલ્મનું શીર્ષક ’દિલ ધડકને દો’ યથાર્થ છે કેમ કે ફિલ્મ જોઈને તમે પણ કહેશો જ કે દિલ ધડકને લગા....

            ઝોયા અખ્તર ફિલ્મ તો વારસામાં લઈને જ જન્મી છે. ઝોયા એટલે જાવેદ અખ્તર અને હની ઇરાનીની પુત્રી અને ફરહાન અખ્તરની બહેન. શરૂઆતના સમયમાં જાવેદ અખ્તર સાહેબ અથવા ફરહાન અખ્તરને લીધે ઓળખાતી ઝોયાની ફિલ્મ ’જિંદગી ના મીલેગી દોબારા’ પછી એક ખૂબ સારી ડિરેક્ટર તરીકે થવા લાગી. માણસના એવા ઇમોશન્સની વાતો જે ક્યાંય રજૂ ન થઈ હોય તે બતાવવામાં ઝોયાની માસ્ટરી છે. આમ તો તેનું પહેલું ડિરેક્ટેડ ફિલ્મ ’લક બાય ચાન્સ’ હતું પણ ઝોયાની ઓળખ ઊભી કરવામાં નિષ્ફળ ગયેલું. આર્ટમાં ગ્રેજ્યુએશન પૂરું કરીને ઝોયા ન્યુયોર્ક યુનિવર્સિટી ફિલ્મ સ્કૂલમાં ફિલ્મ પ્રોડક્શન શીખવા ગઈ પણ પ્રોડક્શન સાથે તેનો એટલો જ રસ ડિરેક્શનમાં પણ હતો. ભારત પરત ફરીને તેણે ’બોમ્બે બોય્ઝ’, ’દિલ ચાહતા હૈ’ અને ’લક્ષ્ય’ જેવી ફિલ્મ આસિસ્ટન્ટ ડિરેક્ટર તરીકે કરી. સિનેમાના ૧૦૦ વર્ષ પર બનેલી શૉર્ટ સ્ટોરીઝની ફૂલ ફિલ્મ ’બોમ્બે ટૉકીઝ’માં પણ ઝોયાની સ્ટોરી જોવી ગમી જ હતી. ઝોયાની ફિલ્મ ’જિંદગી ના મીલેગી દોબારા’ સારી ફિલ્મ જ હતી પણ જો આ ફિલ્મની વાત કરીએ તો એટલું જ કહેવું પડે કે ઝોયા ખૂબ જ સારી ડિરેક્ટર છે. આ ફિલ્મના ડિરેક્શનને તમે શ્રેષ્ઠ ડિરેક્ટેડ ફિલ્મના લિસ્ટમાં મૂકશો જ....

            ફિલ્મની સ્ટોરી પર ઝોયા અને રીમા કાગથી ૨૦૧૧થી જ કામ કરતા હતા. સ્ટોરી અને સ્ક્રીનપ્લે તે બંને મળીને લખશે એવા નિર્ણય સાથે બારીકાઈથી ફિલ્મ લખવા લાગ્યા અને કાસ્ટિંગ પર પણ કામ કરવા લાગ્યા. ફિલ્મની જ્યારે જાહેરાત થઈ ત્યારે રણબિર કપૂર અને કરીના કપૂર ભાઈ બહેનના રોલમાં ફિલ્મમાં કામ કરશે એવી જાહેરાત થઈ અને આ ઉપરાંત ઋત્વિક રોશન અને કેટરીના કૈફના નામની પણ જાહેરાત થઈ પણ ફિલ્મ લેઇટ થતી ગઈ અને એ સાથે સૌથી પહેલા રણબિર કપૂરે ફિલ્મ છોડી અને એ પછી તરત જ કરીનાએ પણ ફિલ્મ કરવાની ના પાડી દીધી. ફિલ્મ પર ફરી કામ ૨૦૧૪માં શરૂ કરવામાં આવ્યું ત્યાં સુધીમાં ઋત્વિક અને કેટરીના પણ ફિલ્મ છોડી ચૂક્યા હતા. હવે ફાઇનલ કાસ્ટિંગમાં રણવિર સિંઘ, પ્રિયંકા ચોપ્રા, ફરહાન અખ્તર અને અનુષ્કા શર્માના નામની જાહેરાત થઈ ચૂકી હતી. આ જાહેરાત સાથે જ અનીલ કપૂર ઘરના મુખ્ય પાત્રની ભૂમિકામાં જોવા મળશે એ પણ જાહેરાત થઈ. અનીલ કપૂર સામે તેમની પત્નીના રોલ માટે પણ ત્રણ નામ સામે આવ્યા હતા. માધુરી દિક્ષિત, તબ્બુ અને રવિના ટંડન પણ છેલ્લી પસંદગી શેફાલી શાહ પર ઉતારવામાં આવી. આમ ૨૦૧૧માં શરૂ થયેલા ફિલ્મના વિચારને ઓન શૂટ જતા છેક મે-૨૦૧૪ સુધી રાહ જોવી પડી! પહેલું શેડ્યૂલ કૃઝ પર નક્કી થયું. ફ્રાન્સ, સ્પેન, ટુનેશિયા અને ઇટલી મુખ્ય લોકેશન્સ હતા. બીજું અને છેલ્લું શેડ્યૂલ મુંબઈમાં ઓગસ્ટ ૨૦૧૪માં શરૂ કરીને ફિલ્મ પૂરી કરવામાં આવી. ફિલ્મના એક એક લોકોશનનો પૂરો ઉપયોગ કરવાનું ચૂક્યા નથી. ઝોયાને વર્લ્ડના સારા લોકેશન્સ ગમે જ છે જે તેની અગાઉની ફિલ્મમાં પણ તમે ઓબઝર્વ કર્યું જ હશે...

            અનીલ કપૂરને સફેદ વાળમાં જોવાની મઝા છે. આ પહેલા પણ ’લમ્હે’માં તમે જોયા જ હશે પણ ઓરીજીનલ સફેદ વાળ સાથે તેમના એક્ટીંગમાં વર્ષોનો અનુભવ દેખાય આવે છે. ૧૯૭૯માં એક નાના રોલ સાથે ફિલ્મમાં પગ મૂકતા અનીલ કપૂરની આજની તારીખ સુધીની ફીટનેસ જોઈને સારા સારાને ઈર્ષા આવે. બહુ ઓછા લોકોને ખબર હશે કે અનિલ કપૂરનું ફિલ્મ ડેબ્યૂટ તેલુગુ ફિલ્મ ’વામસા વૃકસ”થી થયું હતું. આ ફિલ્મમાં અનીલ કપૂર ફેમીલીના વડા કમલ મહેરાના પાત્રમાં છે. અનીલ કપૂર સામે તેમની પત્ની નીલીમા મહેરાના પાત્રમાં શેફાલી શાહ છે. શેફાલી આમ તો સિરિયલ્સ કરતી હતી પણ ફિલ્મમાં તેનો પહેલો બ્રેક ’રંગીલા’માં હતો. શેફાલીની ખૂબ જ સરસ એક્ટીંગ જોવી હોય તો ’મોન્સૂન વેડીંગ’ જોઈ લેવું. કબીર મહેરા તરીકે રણવિર સિંઘ છે. રણવિર માટે એટલું જ કહી શકાય કે ૨૦૧૦માં ઇન્ડસ્ટ્રીમાં પગ મૂક્યો અને ૨૦૧૫માં ટોપના કલાકારમાં તેની ગણતરી થાય છે જે તેના એક્ટીંગ માટે ઘણું કહી જાય છે. રણવિરની બહેનની ભૂમિકામાં આયેશા મહેરા તરીકે પ્રિયંકા ચોપરા છે. મીસ ઇન્ડિયા વર્લ્ડ રહી ચૂકેલી પ્રિયંકા ડિરેક્ટરની એક્ટર છે. પ્રિયંકાના અદભૂત એક્ટીંગનો પરિચય બધાને થયો જ હશે. ફરાહ અલી તરીકે અનુષ્કા શર્મા છે. અનુષ્કા માટે આ પહેલા પણ ઘણું લખી ચૂક્યો છું માટે એટલું જ કહીશ કે મારી ફેવરીટ એક્ટ્રેસ. સન્ની ગીલ તરીકે ફરહાન અખ્તર છે. ફરહાન અખ્તરને કુદરતની સૌથી મોટી ભેટ હોય તો તેનો અવાજ. મંત્રમુગ્ધ કરી દેતા અવાજ સાથે એક્ટીંગ માટે તો બસ ’ભાગ મિલ્ખા ભાગ’ એક જ ફિલ્મ જોઈ લેવું. ઓફબીટ ફિલ્મ જ વધારે કરતો રાહુલ બોઝ માનવ નામના પાત્રમાં છે. રાહુલ સારો એક્ટર હોવા ઉપરાંત સારો ડિરેક્ટર પણ છે. રાહુલની ડિરેક્ટેડ ફિલ્મ ’ધ વિસ્પર્સ’ જો ક્યાંયથી મળે તો જોઈ લેવું. માનવની મમ્મીના પાત્રમાં ઝરીના વહાબ છે. રીધીમા સુદ નૂરીના પાત્રમાં અને તેના પિતાના પાત્રમાં અર્ચના પુરનસિંઘના પતિ પરમિત શેઠી છે. ફિલ્મ જોયા પછી એક પ્રશ્ન ઉપસ્થિત થયો કે શું આ ફિલ્મમાં બધા કલાકારોએ નક્કી કર્યું હશે કે ચલો સ્પર્ધા કરીએ કોણ સારુ એક્ટીંગ કરે છે! એક પણ પાત્ર માટે એમ કહી શકાય તેમ નથી કે આ પાત્ર ખાસ ન જામ્યું. ફિલ્મમાં ઘણા પૂરક કલાકારો પણ છે પણ એક પણ નબળા આર્ટિસ્ટ નથી. દરેક પાત્ર પાસે પૂરતા ન્યાય સાથે કામ લેવામાં આવ્યું છે...

            રીતેષ સીદવાની અને ફરહાન અખ્તર ફિલ્મ પ્રોડ્યૂસર છે. ડાયલૉગ ફરહાન અખ્તરે લખ્યા છે અને વધારાના ડાયલૉગ જાવેદ અખ્તરે લખ્યા છે. મ્યુઝિક શંકર ઇશાન લોયે આપ્યું છે. જંગલી પીકચર્સ અને એક્સેલ એન્ટરટેઇન્મેન્ટને પ્રોડક્શન કંપનીની ક્રેડિટ આપવામાં આવી છે. ઇરોઝ ઇન્ટરનેશનલ ફિલ્મના ડીસ્ટ્રીબ્યૂટર છે. ઝોયાની સ્ટાઇલ મુજબ ફિલ્મનો રન ટાઇમ ખૂબ લાંબો ૧૭૦ મીનીટનો છે. ફિલ્મના પ્રમોશન પર પણ ખાસ ધ્યાન આપવામાં આવ્યું છે. ફિલ્મ ફેમિલી ફિલ્મ છે એટલે અનીલ કપૂર ફેમિલી, જાવેદ અખ્તર ફેમિલી અને  રીતેષ સીદવાની ફેમિલીએ ત્રણ વાર ટ્રેઇલર લોંચ કર્યું. આ ઉપરાંત ચેનલ્સ અને સોશિયલ મીડિયાનો પણ પૂરો ઉપયોગ કરવામાં આવ્યો છે. આમિર ખાને ટ્વિટ કરીને છેલ્લે જ ખુલાસો કર્યો કે ફિલ્મના સૂત્રધાર એટલે કે કૂતરા પ્લુટોનો અવાજ આમિરે આપ્યો છે. કાર્લોસ કેટલાનની અદભૂત સિનેમેટોગ્રાફી પણ આ ફિલ્મને ચાર ચાંદ લગાવે છે. ટૂંકા પ્રસંગો લઈને ક્લાસ ફિલ્મ કેમ બની શકે અને એ પણ લગભગ ત્રણ કલાક સુધી દર્શકોને કેમ સીટ પરથી હલવા ન દે તેનું શ્રેષ્ઠત્તમ ઉદાહરણ આ ફિલ્મ છે. ફિલ્મ ૪ સ્ટાર ડીઝર્વ કરે છે...

પેકઅપ:

"બે ફિલ્મ ’ગૂંડે’ અને ’બાજીરાવ મસ્તાની’માં પ્રિયંકા ચોપરા રણવિર સિંઘની પ્રેમિકા અને પત્ની તરીકે છે ત્યારે આ ફિલ્મમાં બહેન બનાવવી બહુ જ અઘરી પડી હશે"

વેલકમ ટુ કરાચી: કૉમેડીના નામે મજાક

           આમ જોઈએ તો ફિલ્મ બનાવવી એ જ અઘરો વિષય છે પણ ફિલ્મના વિવિધ ઝોનરમાં સૌથી અઘરું ઝોનર હોય તો કૉમેડી કેમ કે કૉમેડી માટે સારી સ્ક્રીપ્ટ, સારા ડાયલૉગ્ઝ, સારા આર્ટિસ્ટ્સ અને શ્રેષ્ઠ ટાઇમીંગ બધું જ સાથે હોય તો અને તો જ એક સારી ફિલ્મ બની શકે. કદાચ એવું બને કે આમાંથી એકાદ કે બે પાસા નબળા હોય તો પણ ચાલે એવી ફિલ્મ બની શકે પણ જો આખી ફિલ્મ પાસે એક જ સારો આર્ટિસ્ટ હોય તો ફિલ્મને કેમ ખેંચી શકાય? યાર ભગનાની સાહેબ સાવ આવી કૉમેડીના નામે દર્શકોની મજાક થોડી ઉડાડાતી હશે....

            આશિશ આર. મોહન માત્ર ૧૭ વર્ષની ઉમરે જ હિમાચલ છોડીને મુંબઈ આવેલા આશિશને નસીબ જોગે પહેલો જ પરિચય અનીલ દેવગણ સાથે થયો અને અજય દેવગણ અભિનીત ’બ્લેકમેઇલ’માં આસિસ્ટન્ટશીપ કરવા મળી. નસીબ જ્યારે સાથ આપે ત્યારે દરેક વાત પોઝીટીવ થતી જતી હોય છે, આમ જ એ સેટ પર જ તેની મુલાકાત રોહિત શેટ્ટી સાથે થઈ. રોહિતને મળતા સાથે જ તેણે રોહિત સાથે આસિસ્ટન્ટશીપ શરૂ કરી. અશિશે રોહિતને ’ગોલમાલ’, ’ગોલમાલ રિટર્ન’, ’ઓલ ધ બેસ્ટ’, ’ગોલમાલ ૩’માં આસિસ્ટ કર્યા. આશિશને લાગ્યું કે તે હવે કૉમેડી ફિલ્મ જરૂર ડિરેક્ટ કરી શકશે એટલે તેમની પહેલી જ ફિલ્મ અક્ષય કુમાર સાથે ’ખીલાડી 786' પોતાના ડિરેક્શનમાં કરી. ફિલ્મ ખાસ કમાણી કરી શકી નહીં પણ આશિશ ડિરેક્ટર બની ગયા.  હવે એમનું ડિરેક્શન કેવું છે એ જોવા માટે તો તમે ફિલ્મ જોતા જ નહીં કેમ કે ટાઇમીંગ નામે આ ફિલ્મમાં કંઈ જ નથી. મને તો લાગે છે કે આગલી ફિલ્મના તેમના ડિરેક્શનને પ્રોડ્યૂસર્સ તરફથી ખાસ ઓબઝર્વ કરવામાં આવ્યું હશે અને કદાચ આ કારણોથી જ આશિશને ૨૦૧૨ પછી ૨૦૧૫ સુધી રાહ જોવી પડી હશે...

            કોણ જાણે કેમ પણ ફિલ્મ ખૂબ જ હેરાનગતીના અંતે પૂરી થઈ શકી છે. ઑક્ટોબર ૨૦૧૪માં ફિલ્મનો મહુરત શોટ લેવામાં આવ્યો હતો અને એ સમયે લીડ અર્શદ વારસી સાથે ઇરફાન ખાન કરવાના હતા. મહુરત વખતે જ અર્શદે કહ્યું હતું કે ’’એક હીટ ફિલ્મ માટે બે સારા કલાકારથી વધારે શું જોઈએ?". ફિલ્મને યુ.કે. અને સ્કૉટલેન્ડમાં શૂટ કરવાનું નક્કી કરવામાં આવ્યું. પહેલે જ અઠવાડિયે ખબર પડી કે ઇરફાન ફિલ્મ છોડીને જતા રહ્યા છે. ઇરફાનનું ફિલ્મ માંથી હટવાનું કારણ ઇરફાને સજ્જતા દાખવીને આપ્યું નહીં. ઇરફાનની જગ્યા પર પ્રોડ્યૂસર વાસુ ભગનાનીના પુત્ર જેક્કીને લેવામાં આવ્યો. શૂટ શરૂ તો થયું પણ ફરી અટકી ગયું. વાસુ ભગનાની દ્વારા સમાચાર આપવામાં આવ્યા કે તેમના કરોડો રૂપિયાના ફિલ્મ ઇન્સ્ટ્રુમેન્ટ્સ ચોરી થઈ ગયા અને શૂટ અટકી ગયું છે પણ ખણખોદિયા ફિલ્મ પત્રકારોએ શોધી કાઢ્યું કે ખરેખર હોટેલનું પેમેન્ટ ન કર્યું હોવાથી બધા જ ઇન્સ્ટ્રુમૅન્ટ હોટેલ મેનેજ્મેન્ટ કબ્જે કરી ચૂક્યું હતું. આ ઉપરાંત કોઈ પણ કલાકારને હોટેલ છોડવાની મંજૂરી પણ નહોતી. ગમે તેમ કરીને વાસુ ભગનાનીએ પેમેન્ટ તો કર્યું પણ કાસ્ટ અને કૃ ૧૦ દિવસ સુધી હોટેલમાં જ નજર કેદ રહ્યા! આટલું પૂરતું નહોતું ત્યાં એક નવી મુસીબત આવી કે સ્કૉટલેન્ડ મીલ્ટ્રી સાચા તાલીબાની માનીને બધા આર્ટિસ્ટને પકડી ગઈ. ફરી ૪ દિવસ શૂટીંગ અટક્યું. હજુ હેરાનગતી રહી જતી હતી ત્યાં મીડિયા સામે અર્શદ વારસીએ સ્ટેટમેન્ટ આપ્યું કે "જો ઇરફાન ફિલ્મમાં હોત તો ફિલ્મનો અનુભવ જ કંઈક અલગ હોત. જેક્કી યંગ આર્ટિસ્ટ છે અને વળી અનુભવની ખામી એટલે ફિલ્મ અલગ રીતે બહાર આવશે". જો કે ટ્રેલર લોચીંગ વખતે આ વાત પરથી અર્શદ ફરી ગયો પણ ફિલ્મને અસર તો પડે જ. આટલી મુસીબત પછી પણ ફિલ્મ માટે એટલું તો કહેવું જ પડે કે ઇરફાનના ફિલ્મ છોડ્યા પછી જરૂર આ ફિલ્મની સ્ક્રીપ્ટમાં પણ ફેરફારો થયા હશે. આખી ફિલ્મમાં ક્યાંય પણ ટાઇમીંગ જેવી વાત જ ઊભી નથી થઈ શકી અને એક પણ પંચને બહાર લાવવાનું શક્ય જ નથી બન્યું. ફિલ્મ જોવાનો પણ થાક લાગે એવી હથોડા છાપ કૉમેડી એક દિવસ અગાઉ રીલીઝ કરીને કદાચ જાતે જ શુક્રવારનું ઑડિયન્સ તોડવા માંગતી હશે!!!

            કેરિયર માણસને ક્યાંથી ક્યાં લઈ જાય એ ઘણીવાર નક્કી જ નથી  થતું. ૧૭ વર્ષની ઉમરે ડોર ટુ ડોર વેચાણ કરતો સેલ્સમેન અર્શદ ડાન્સનો શોખીન હતો. તેના આ શોખે જ તેને ૧૯૮૬માં અકબર સામીના ડાન્સ ગૃપ સાથે જોડ્યો. ડાન્સમાં જ સતત રચ્યો પચ્યો રહેતો અર્શદ ઇન્ડિયા લેવલની ડાન્સ કોમ્પીટીશનમાં ચોથા નંબરે આવ્યો. ૧૯૯૨માં ’રૂપ કી રાની, ચોરો કા રાજા’ ફિલ્મના ટાઇટલ ટ્રેકને કોરિયોગ્રાફ કરવાનો તેને મોકો મળ્યો. એક્ટીંગ માટે ક્યારેય વિચાર ન કરતા અર્શદે એ.બી.સી.એલ.ની જાહેરાત જોઈ પોતાનો બાયૉડેટા મોકલ્યો. આમ ૧૯૯૬માં તેને પહેલી ફિલ્મ ’તેરે મેરે સપને’ કરી. આ પછી તેને ફિલ્મ્સ મળતી રહી પણ ’મુન્નાભાઈ એમ.બી.બી.એસ.’ના સર્કિટને તો લોકો પ્રેમ કરવા લાગ્યા અને એ પછી ’ઇશ્કિંયા’નો બબ્બન પણ લોકોના હ્રદયમાં વસી ગયો. કૉમેડીની વાત આવે તો અર્શદનો જોટો શોધવો મુશ્કેલ છે પણ અહીં સાચે જ એક વાત સમજમાં આવી કે અર્શદ એક કો-સ્ટાર તરીકે ખૂબ સારુ કામ કરી શકે છે પણ જો સાથેનો સ્ટાર મજબૂત હોય તો જ. સર્કિટ એટલે જ લોકોને ગમ્યો કેમ કે સામે સંજય દત્ત એટલી જ મહેનત સાથે પંચ આપી અને ઉપાડી શકતો.  અર્શદ સાથે સેકન્ડ લીડમાં જેક્કી છે. જેક્કીની જો કોઈ ખૂબી હોય તો એ કે તેના પિતા પ્રોડ્યૂસર છે.  જેક્કી આ પહેલા પાંચ ફિલ્મ કરી ચૂક્યો છે પણ એમાં એક જ ખૂબી છે કે વાસુ ભગનાનીનો પુત્ર. ગુજરાતી માણસ તરીકે બતાવવામાં આવેલા જેક્કીને જોઈને જેમ સુજ્ઞ પ્રેક્ષકોને દિશા વાંકાણી તરફ દયા આવે એ રીતે જે તેના પર આવે છે. જેક્કીને ડાયલૉગ પણ દિશાની સ્ટાઇલથી જ બોલાવવામાં આવ્યા છે અને જે હસાવવાને બદલે ખૂંચે છે. હીરોઇન તરીકે સ્કૉટલેન્ડની ડાન્સર લોરેન છે. લોરેન ભલે સ્કૉટલેન્ડથી છે પણ હિન્દી ઇન્ડસ્ટ્રી સાથે તેનો નાતો સારો એવો રહ્યો છે. આ પહેલા તે ’એબીસીડી’ અને ’ડિટેક્ટિવ બ્યોમકેશ બક્ષી’માં નાના નાના રોલ પણ કરી ચૂકી છે બાકી ઘણા ડાન્સ ડિરેક્ટર્સ સાથે કામ કરી ચૂકી છે. ફિલ્મમાં તેને આપવામાં આવેલો એક માત્ર ડાન્સ સારી રીતે કર્યો છે પણ સામે મ્યુઝિક એટલું જ ખરાબ છે કે ગીત યાદગાર નહીં જ બની શકે. દિલીપ તાહિલ જેવા વર્ષોના અનુભવી કલાકાર પણ એટલાં જ ખરાબ લાગે છે જેટલું ફિલ્મ....

            ફિલ્મને થોડી ઘણી પણ રોચક બનાવવા કૌશલ બક્ષી, આશિશ મોહન સાથે અર્શદ વારસીએ પણ મહેનત કરી છે. મારા સારા મિત્ર વ્રજેશ હીરજીએ ફિલ્મ લખી છે પણ તેની ઓરીજીનલ વાર્તા અને ફિલ્મ વચ્ચે ખૂબ મોટો તફાવત છે માટે વ્રજેશને કંઈ કહેવું યોગ્ય નથી. સંગીત જીત ગાંગુલી, કે.કે. અને અમજદ નદીમનું છે. સિનેમેટોગ્રાફી માર્ક ન્યુટ્કીન્સની છે અને જે જોઈને તમને થશે કે જો ફોરેનના સિનેમેટોગ્રાફરને લીધો હોય અને છતા દ્ગશ્યો આઉટ ફોકસ જતા હોય તો શા માટે આવી મહેનત કરવી? પ્રોડક્શન કંપની તરીકે પૂજા એન્ટરટેઇન્મેન્ટને ક્રેડિટ આપવામાં આવી છે અને એ.એ. ફિલ્મ્સ ફિલ્મને ડીસ્ટ્રીબ્યૂટ કરી રહી છે. ફિલ્મને માત્ર અર્શદ વારસી માટે જ ૧.૫ સ્ટાર આપી શકાય....

પેકઅપ:

"આ ફિલ્મમાં શ્રેષ્ઠત્તમ અભિનય આપ્યો છે"-જેક્કી ભગનાની.... આવું સ્ટેટમેન્ટ ન કરાય જેક્કી ભાઈ કોઈ કાસ્ટ જ નહીં કરે.....

તનુ વેડ્સ મનુ રીટર્ન્સ: મજબૂત સિક્વલ

           ફિલ્મનો એક ભાગ હીટ જાય એટલે બીજા ભાગની તૈયારી થવા જ લાગે પણ ભાગ્યે જ એવું બનતું હોય કે બીજો ભાગ જોવા લાયક હોય! અને એમાં પણ જો પહેલા ભાગથી બીજો ભાગ ચળિયાતો હોય તો કહેવું જ શું? સિક્વલ બનાવવા માટે સૌથી પહેલા તો ખૂબ સારી વાર્તા જોઈએ અને એ પણ એવી કે લોકોને એમ લાગે કે હાં ધરાર સિક્વલ બનાવવામાં નથી આવી. હિંમાશુ શર્માને દાદ આપવી પડે કે પહેલા ભાગ કરતા મુઠ્ઠી ઊંચુ ફિલ્મ લખવામાં સફળતા મેળવી અને એક મજબૂત સિક્વલ આપી શક્યા...

            આનંદ એસ. રાય એટલે ડિરેક્ટર રવિ રાયના ભાઈ. કોમ્પ્યૂટર એન્જિનિયર હોવા છતા તેમનું ધ્યેય હતું એટલે રવિ રાયને તેમની સિરિયલમાં આસિસ્ટ કરવા મુંબઈ આવી ગયા. આ પછી તેમણે એક બે સિરિયલ પણ ડિરેક્ટ કરી પણ ધ્યેય ફિલ્મ હોવાથી ૨૦૦૭માં ’સ્ટ્રેન્જર’ ફિલ્મ ડિરેક્ટ કર્યું. જેની નોંધ ન લેવાણી. આ પછી ૨૦૦૮માં ’થોડી લાઇફ થોડા મેજિક’ ડિરેક્ટ કરી, એ પણ ન ચાલી. ૨૦૧૧માં ’તનુ વેડ્સ મનુ’ ખૂબ સારી ચાલી અને એ સાથે તેમનું સ્થાન નિશ્ચિત થઈ ગયું. આ પછીની તેમની ફિલ્મ ’રાંઝણા’ સાથે તો આનંદ રાયનું નામ સારા ડિરેક્ટર્સમાં આવવા લાગ્યું. પહેલો ભાગ હીટ હતો અને ડિરેક્શન પણ સારુ જ હતું તો પણ બીજા ભાગ માટે  એમ કહેવું પડે કે શ્રેષ્ઠ ડિરેક્શન. એવી ઘણી બધી ઘટનાઓ છે જ્યાં ઇચ્છે તો ડિરેક્ટર સહેલાઇથી દ્ગશ્ય દેખાડી અને જતું કરી શકે પણ ફિલ્મના એક પણ દ્ગશ્યમાં કૉમ્પ્રોમાઇઝ કરવામાં નથી આવ્યું. એક એક રીએક્શન પણ એટલી જ ખૂબી સાથે લેવામાં આવ્યું છે. આનંદ રાય આ ફિલ્મ સાથે નક્કી પૂરતી ક્રેડિટ કમાશે જ....

            કંગના રનૌત ભલે ગમે તેવી સાયકો બિહેવીયર કરતી હોય પણ એક્ટીંગની વાત આવે ત્યારે કંગનાના વખાણ જ કરવા પડે. કંગના ઇન્ડસ્ટ્રીમાં આવી ત્યારે તેને અંગ્રેજી બોલતા નહોતું આવડતું. ઘણા અખબારોમાં કંગના વિષે ઘણું નેગેટિવ લખાતું હતું, જેની અસર કંગના પર થતી. વિચિત્ર વર્તન દ્વારા સતત સમાચારમાં રહેતી કંગના માટે લોકોના માનસમાં એવી જ છાપ હતી કે માત્ર પોતાની જાતને હાઇલાઇટ કરવા આવું વર્તન કરે છે અને કંગનાને એક્ટીંગ આવડતી જ નથી. આ વાતનો જવાબ આપતા ૨૦૦૬ની પહેલી ફિલ્મ ’ગૅંગ્સ્ટર’થી શરૂ કરીને છેક ૨૦૧૧ની ’તનુ વેડ્સ મનુ’ સુધીની સફર ખેડવી પડી! અને ૨૦૧૪ની ’ક્વિન’ પછી તો તેણે લોકોની બોલતી બંધ કરી દીધી. આ ફિલ્મમાં હરિયાણવી ભાષામાં કંગનાને બોલતી જોવી એ એક લહાવો છે. સૌથી નોંધવા લાયક વાત એ છે કે કંગના ડબલ રોલમાં છે અને એક મીનીટ માટે પણ તમને એમ નહીં જ લાગે કે આ એક જ હીરોઇન છે જે બે રોલ કરી રહી છે.  આર. માધવન પણ સતત મહેનત કરતો કલાકાર છે. ટેલિવિઝન એડથી પોતાની કેરિયર શરૂ કરનાર માધવનની પહેલી ફિલ્મ ૧૯૯૬માં ’ઇસ રાત કી સુબહા નહીં હોગી’ હતી. આ પછી હિન્દી ઉપરાંત તામિલ અને અંગ્રેજી ફિલ્મ્સ પણ કરી. માધવનની સૌથી મોટી ખૂબી એ છે કે એ હંમેશા અંડર એક્ટ કરે છે જે તેને અન્ય કલાકારોથી અલગ પાડે છે. જીમ્મી શેરગીલ રાજા અવસ્થીના પાત્રમાં છે. લોકોને યાદ નહીં હોય પણ જીમ્મીની કેરિયરની પહેલી ફિલ્મ ૧૯૯૬માં ગુલઝાર સાહેબની ’માચીસ’ હતી. જીમ્મીને આ પછી સતત ફિલ્મ્સ મળતી રહી છે. હિન્દી ઉપરાંત તે પંજાબી ફિલ્મ્સનો પણ માનીતો અને જાણીતો કલાકાર રહ્યો છે....

            આ મુખ્ય કલાકારો ઉપરાંત પણ બધા આર્ટિસ્ટ્સ ખૂબ સારી રીતે સિલેક્ટ કરવામાં આવ્યા છે. પપ્પી તરીકે દીપક ડોબ્રીયાલ છે. દીપક મૂળભૂત રીતે ડ્રામા આર્ટિસ્ટ છે. ટીપીકલ દેખાવને લીધે તેને સારા સારા ડિરેક્ટર્સ તરફથી સ્પેસિયલ રોલ મળતા જ રહ્યા છે. જસ્સી તરીકે એઝાઝ ખાન છે. એઝાઝ પણ ૧૯૯૯થી ફિલ્મ સાથે જોડાયેલ છે પણ તેની ખાસ નોંધ લેવાય તેવું કોઈ પાત્ર હજુ સુધી મળ્યું નથી. પાયલ રાઠોર તરીકે સ્વરા ભાસ્કર છે. આ સુંદર કન્યા લીડને લાયક છે પણ તેને સપોર્ટીંગ રોલ્સ જ મળ્યા છે અને જે તેણે પૂરી ઈમાનદારી પૂર્વક નિભાવ્યા છે. ચિન્ટુ તરીકે ઝીશાન અયૂબ છે. ઝીશાન એક પછી એક રોલમાં પોતાની ઓળખ વધારતો જ જાય છે. બહુ જ ટૂંકા સમયમાં ઝીશાન જાણીતું નામ બનશે એ નક્કી છે. તનુના પિતાના પાત્રમાં રાજેન્દ્ર ગુપ્તા અને માતાના પાત્રમાં નવની પરિહાર છે. વર્ષોના અનુભવી કે.કે. રૈના મનુના પિતાની ભૂમિકા ભજવે છે. તનુંનું બીજુ પાત્ર એટલે દત્તો અને દત્તોના ભાઈની ભૂમિકામાં રાજેશ શર્મા છે...

            પહેલો ભાગ સફળ થયાના એક મહિના પછી જ બીજો ભાગ ડિક્લેર કરવામાં આવ્યો હતો. એ સમયે ફિલ્મનું ટાઇટલ ’તનુ વેડ્સ મનુ-સિઝન 2’ નક્કી કરવામાં આવ્યું હતું પણ સમય જતા જ્યારે લોંચ થઈ ત્યારે ’તનુ વેડ્સ મનુ રીટર્ન્સ’ થઈ ગયું. એક વાત એવી પણ સાંભળવા મળી હતી કે આર. માધવનની જગ્યાએ શહીદ કપૂરને લેવામાં આવશે. આમ તો ફિલ્મ તરત જ બનાવવાની હતી પણ આનંદ રાય ’રાંઝણા’ બનાવવામાં વ્યસ્ત થઈ ગયા એટલે પ્રોજેક્ટ પાછળ ઠેલાય ગયો. આ સમય દરમિયાન એવી વાત સાંભળવા મળી કે સિક્વલમાં ઇમરાન ખાન અને અનુષ્કા વર્મા મુખ્ય પાત્રો ભજવશે પણ છેલ્લે એ જ પાત્રો સાથે ઑક્ટોબર ૨૦૧૪માં ફિલ્મ શરૂ કરવામાં આવી. લોંચ થતા સાથે જ ફિલ્મને વિવાદમાં સપડાવું પડ્યું. જૂના પ્રોડ્યૂસર્સ તરફથી દાવો માંડવામાં આવ્યો કે તેમની મંજૂરી વિના બીજો ભાગ ડિરેક્ટર ન બનાવી શકે પણ કોર્ટ તરફથી આનંદ રાયનો જવાબ ગ્રાહ્ય રાખવામાં આવ્યો કે તેમણે કોઈ એવો એગ્રીમેન્ટ સાઇન નથી કર્યો કે તે બીજો ભાગ ન બનાવી શકે...

            પતિ અને પત્નીના સંબંધો એક સમય પછી એક બીજાને બોજ લાગવા લાગે છે. માધવન અને કંગનાના મેન્ટલ હોસ્પિટલના ઝગડાથી શરૂ થયેલી ફિલ્મ એટલી સરળતાથી આગળ વધે છે કે તમને સતત ગમતી જ રહેશે. પતિને એમ લાગે છે કે પત્ની તેને ત્રાસ આપે છે અને પત્નીને એમ લાગે છે કે પતિ તેને ત્રાસ આપે છે. પતિને મેન્ટલ હોસ્પિટલમાં છોડીને પત્ની કાનપુર આવી જાય છે. માધવનને દીપક છોડાવી દેશ પરત લાવે છે. માધવનનો પરિચર દત્તો એટલે કે બીજી કંગના સાથે થાય છે. નસીબ ખરાબ કે દત્તો માટે તેના ભાભીએ જોઈ રાખેલો છોકરો એટલે જીમ્મી શેરગીલ જ છે જે પહેલા ભાગમાં કંગના સાથે લગ્ન કરવાનો હતો. આ બધી જ લમણાઝીંક વચ્ચે ઘણા પાત્રો પોત પોતાનો રોલ ભજવે છે. અંત પર આવતા ફિલ્મ ઇમોશનલ થઈ જાય છે. કંગનાને ખબર પડે છે કે દત્તો સાથે માધવન લગ્ન કરી રહ્યો છે ત્યારે સત્યનો પરિચય થાય છે અને એ પછીની તેની માનસિક હાલત એટલે ફિલ્મનો શ્રેષ્ઠ ભાગ. એક એક દ્ગશ્ય વચ્ચે આવતી કૉમેડી હોય કે પછી ઇમોશનલ દ્ગશ્ય હોય ખૂબ માવજત સાથે કૅમેરામાં ઝીલવામાં આવ્યા છે. ફિલ્મને દરેક એંગલથી માણી શકાય એવી ફિલ્મ બની શકી છે...

            કિશોર લુલ્લા અને આનંદ રાય બંને પ્રોડ્યૂસર્સ છે. પ્રોડક્શન કંપનીની ક્રેડિટ કલર યલ્લો પીક્ચર્સને આપવામાં આવી છે. ગીતો તનીષ્ક-વાયુએ કંપોઝ કર્યા છે. ઇરોઝે ફિલ્મ ડીસ્ટ્રીબ્યૂટ કરી છે. ફિલ્મની સૌથી મોટી ક્રેડિટ જો કોઈ પણને આપવી હોય તો હિંમાશુ શર્માને આપવી પડે. ફિલ્મના દ્ગશ્યો તો શ્રેષ્ઠ લખ્યા જ છે પણ સંવાદો તો એક થી એક ચડે એવા છે. ફિલ્મને કંજૂસાઈ સાથે સ્ટાર આપવાનાં હોય તો પણ ૪ સ્ટાર આપવા જ પડે...

પેકઅપ:

"વાળ કપાવતી વખતે મારા વાણંદે પૂછ્યું કે ’સાહેબ ટૂંકા કરી દઉં?" મેં જવાબ આપ્યો કે "લાંબા તો નથી જ કરી શકવાનો તો ટૂંકા જ કરી દે"