બરખા: ના વરસી શકી

        જો તમે અનુભવી ફિલ્મ પોડ્યૂસર હો તો એક કલા તમારામાં આવી જ જાય કે ક્યા સમયે ફિલ્મ રીલીઝ કરવું. હાં, એ વાત અલગ છે કે જો તમે નવા પોડ્યૂસર છો તો તમે નક્કી ન કરી શકો કે મારે ક્યા સમયે ફિલ્મ રીલીઝ કરવું છે, બસ એટલું જ જોવાનું હોય કે ફિલ્મ રીલીઝ થાય છે. જ્યારે વર્લ્ડ કપની સીઝન અંત પર હોય, જ્યારે એક્ઝામ્સ ચાલુ હોય ત્યારે ફિલ્મ રીલીઝ કરવાની હિમ્મત સારા સારા લોકો ના કરે પણ નવા પોડ્યૂસર્સ માટે આવા ખરાબ સમય પર જ ફિલ્મ રીલીઝ કરવાનો ફોર્સ કરવામાં આવતો હોય છે. શબાના હાઝમીના પ્રોડક્શનનું આ પહેલું ફિલ્મ છે માટે હજુ તેના મૂળિયા ઊંડા ન જ ઊતર્યા હોય એટલે સહન તો કરવું જ પડે. માત્ર આ કારણો જ નહીં લવ સ્ટોરી જો હટીને ન હોય તો ચાલતી નથી જ અને જો ચાલે તો પછી રોકાતી પણ નથી. અહીં હીરોઇનનું નામ બરખા છે અને તેના નામ પરથી જ ફિલ્મનું ટાઇટલ રાખવામાં આવ્યું છે પણ બરખા એવી છે કે વરસી શકી નથી...

        ફિલ્મ એક સમૂહની ઘટના છે જો વાર્તા સારી હોય અને સ્ક્રીનપ્લે સારો ન હોય કે પછી ડાયલૉગ સારા ન હોય તો ફિલ્મની મઝા મરી જાય. ’બરખા’ની વાર્તા પણ જાણીતી વાત મુજબ જ શરૂ થઈ. ફિલ્મનો હીરો તહા શાહ હિમાચલ ફરવા જાય ત્યાં એક છોકરી એટલે કે સારા લોરેનને જોઈ જાય અને પહેલી નજરનો પ્રેમ શરૂ થાય છે જે સાવ સામાન્ય પ્રેમ કહાની છે. આ પછી એ જ છોકરી ફરી તેને મુંબઈમાં મળી જાય છે. હીરો હીરોઇનની મુલાકાત માટે એક ખાસ પ્રસંગ ગોઠવવામાં આવ્યો. હીરોના પિતા પુનિત ઇસ્સાર પાસે શેટ્ટી એટલે કે આશિષ રોય મળવા આવે છે જે એક બારના માલિક છે. પુનિત ઇસ્સાર શેટ્ટીનું કામ રૂપિયા વગર કરે છે જેના માટે હીરો અને તેના મિત્રને તેના બાર પર આવવાનું કહે છે. હીરો બારમાં જ્યારે હીરોઇનને બાર ડાન્સર તરીકે જુએ છે ત્યારે દિલ તો તૂટે જ છે પણ પ્રેમ અટકતો નથી. આખરે હીરોઇન પ્રેમને સમજે છે પણ એ પહેલા એક વાત કહે છે કે આ પહેલા તેની સાથે એક વ્યક્તિ રમત રમી ચૂક્યો છે. એ વ્યક્તિ તેની સાથે લગ્ન કરીને પોતાના બંગલામાં લઈ ગયો હતો અને તે પ્રેગનેન્ટ થઈ ત્યારે છોડીને જતો રહ્યો. તેના થકી હીરોઇનને એક બાળકી પણ છે. હવે જ્યારે હીરો લગ્ન જ કરવા માગે છે ત્યારે હીરોના પિતા હીરોના ભાઈ એટલે કે પ્રિયાંશુ ચેટર્જીને બોલાવે છે. ભાઈ ઘેર આવીને છોકરીનો ફોટો જુએ છે ત્યારે કંઈ પણ બોલ્યા વગર ઘર છોડીને જતો રહે છે. ફિલ્મને જોડવા માટે એક ’અક્સ’ ટાઇટલ સાથેની નોવેલ વણવામાં આવી છે. ફિલ્મના અંતમાં પ્રિયાંશુ હાર્ટ એટેકમાં મૃત્યુ પામે છે અને નોવેલ પરથી હીરો હીરોઇન સુધી પહોંચી જાય છે.  આમ જુઓ તો આ વાત નવી પ્રકારની લાગશે પણ જો ફિલ્મના ડાયલૉગ અને સ્ક્રીનપ્લે જોઇશો તો કોઈ પણ રીતે એક બીજા સાથે સંલગ્ન હોય એવું ક્યાંય દેખાતું નથી. બે ચાર વાર ગાળો બોલાવીને ફિલ્મને ’એ’ સર્ટીફીકેટ અપાવવામાં આવ્યું છે જે ગાળો પણ વ્યર્થ જ છે...

        સારા લોરેનનું ખરું નામ મોના લીઝા હુસૈન છે પણ ફિલ્મ ઇન્ડસ્ટ્રીમાં નામ બદલવું એ સામાન્ય ઘટના છે. સારા આમ તો મૂળ પાકિસ્તાની છે અને ત્યાંની પ્રખ્યાત કહી શકાય એવી સિરિયલ્સ ’મહેર બનો ઔર શાહ બનો’, ’રિયાસત’, ’ઉમરા ઓ જાન એ અદા’ કરી ચૂકી છે. પાકિસ્તાનના લોકલ એવૉર્ડ પણ જીતી ચૂકી છે. હિન્દી ઇન્ડસ્ટ્રીમાં તેનું પહેલું ફિલ્મ ’કજરારે’ હતું. આ પછી ’લવ મેં ગમ’ કર્યું અને છેલ્લે ’મર્ડર ૩’ પણ કર્યું. સારાની બહુ જ ટૂંક સમયમાં ’ફ્રોડ સૈયા’, ’ઇશ્ક ક્લિક’ અને ’વેલકમ બેક’ છે. સારા માટે ભલે આ મહત્વનું ફિલ્મ હોય કે નહીં પણ સારા પહેલી ફિલ્મથી લઈને અત્યાર સુધી માત્ર એક સેક્સ ડોલ જેવી જ લાગી છે. સારા પાત્રને ન્યાય આપવો એ સારાની હજુ ત્રેવડ નથી ઊભી થઈ. ફિલ્મનો હીરો તહા શાહ અબુધાબીમાં જનમ્યો છે અને વિદેશમાં અભ્યાસ કરી ચૂક્યો છે. માત્ર ૧૬ વર્ષની ઉમરે જ મોડેલીંગમાં ઝંપલાવી ચૂક્યો હતો. તહાએ હોન્ડા, બકાર્ડી, ઇમીરાત્સ બેંક, નેશનલ બેંક ઑફ અબુધાબી જેવી ઘણી એડ કરી ચૂક્યો છે. તહાની પહેલી ફિલ્મ ૨૦૧૧માં ’લવ કા ધી એન્ડ’ હતી. આ પછી તેણે ૨૦૧૩માં ’ગીપ્પી’ કરી પણ ભાગ્યે જ કોઈ થિયેટરમાં લાગી. જો કે એક વાત કહી દઉં કે તહા કરોડપતિ ખાનદાનનો છે તેને કોઈ પણ ફિલ્મ ચાલે કે ન ચાલે કોઈ જ ફેર નથી પડતો. હીરોઇનની ફ્રેન્ડના પાત્રમાં શ્વેતા પંડિત છે. શ્વેતા આમ તો સિંગર છે અને સારી કંપોઝર પણ છે. શ્વેતાની પહેલી ફિલ્મ ’ડેવિડ’ હતી. શ્વેતા ખૂબ મહેનત કરતી દેખાય છે પણ એક સલાહ કે તેણે એક્ટીંગ કરતા સિંગીંગમાં જ ધ્યાન આપવું જોઈએ. પ્રિયાંશુ ચેટર્જી હીરોના ભાઈના રોલમાં છે. પ્રિયાંશુ ૨૦૦૦થી ફિલ્મ સાથે જોડાયેલ છે. તેની પહેલી ફિલ્મ ’તુમ બીન’ હતી. આ પછી હિન્દી ફિલ્મ્સ ઉપરાંત મરાઠી અને બંગાળી ફિલ્મ્સ પણ કરી. અહીં તેના માટે અલગ પ્રકારનો રોલ ચોક્કસ છે પણ હીરોઇન સામે તેની ઉમર વધારે દેખાય છે. પુનીત ઇસ્સારનું પણ ઘણા સમયે કમબેક છે. પુનીત ઇસ્સારનો ઠાઠ હજુ એવો ને એવો જ છે...

        ફિલ્મનું મ્યુઝિક અમજદ-નદીમનું છે. મ્યુઝિકમાં પાકિસ્તાની સુફી મ્યુઝિકની ઝલક દેખાય છે જે કર્ણપ્રિય તો છે જ. મુજાહિદ રઝાની સિનેમેટોગ્રાફી સારી ન કહી શકાય તો ખરાબ કહી શકાય એમ પણ નથી. ફિલ્મમાં પ્રોડક્શન કંપની તરીકે ઝહારા પ્રોડક્શનને ક્રેડિટ આપવામાં આવી છે અને અગાઉ વાત થઈ એ મુજબ નવા પ્રોડ્યૂસરનો કોઈ હાથ ન પકડે તેમ ઝહારા પ્રોડક્શને જ ફિલ્મ ડીસ્ટ્રીબ્યુટ કરી છે...

        ફિલ્મ માટે લોકેશન્સથી લઈને કૉસ્ચ્યૂમ સુધી બધી જ મહેનત લેવામાં આવી છે પણ ફિલ્મ પોતાની ઇમ્પેક કહી શકાય એ ઊભી કરવામાં સદંતર નિષ્ફળ રહી છે. આ ઉપરાંત સ્ક્રીનપ્લેમાં પણ ઘણી જગ્યા પર ખાંચા છે. હીરોનો મિત્ર દરગાહ પર હીરોઇન સાથે વાત કરતો હોય અને દ્ગશ્ય હીરોના આઉટ હાઉસ પર જતુ રહે એટલાં માટે કે એ દેખાડવાનું હોય કે હીરો હીરોઇનની બધી વસ્તુઓ સાચવે છે. આ રીતે જ હીરો હીરોઇનને પોતાના મા-બાપને મળાવે અને તેની સાથે જ મા-બાપ રોષ જાહેર કરે કે હીરોઇન એક દીકરીની માં છે તો સમાજ શું વાતો કરશે? હવે આ વાત કેમ થઈ ગઈ એ જાણી જ ન શકાય. પુનિત ઇસ્સારને એક સારા પિતા બતાવવામાં આવ્યા છે પણ તેના મોઢે જૂના પુરાણો જોક  ’સારો વકીલ એ હોય જે વકીલાત જાણતો હોય અને શ્રેષ્ઠ વકીલ એ હોય જે જજને જાણતો હોય’નો પ્રયોગ કરી એક ડીગ્નીટી વાળા પિતાના રોલને કેમ દાબવામાં આવ્યો હશે? જે હોય તે બસ ફિલ્મમાં સમય બગાડવા જેવો નથી. બહુ કરીએ તો પણ ફિલ્મ ૨ સ્ટારથી વધારે ડીઝર્વ કરતું જ નથી...

પેકઅપ:

"ફિલ્મમાં મૂર્ખ બનવાની મઝા જ અલગ છે. ’પ્યાર તો હોના હી થા’માં કાજોલ પબ્લિક ટોયલેટ યુઝ કરવા માટે સ્ટેશન પર ઊતરે છે અને તેની ટ્રેઇન છૂટી જાય છે. કદાચ કાજોલને ખબર નહીં હોય કે ટ્રેઇનના દરેક ડબ્બામાં ટોયલેટ હોય છે"

હન્ટર: હળવી વાત સાથે મોટો શિકાર

       ઘણી વાર ફિલ્મનો પ્રચાર કઈ રીતથી કરવો એ અઘરી વાત બની જાય છે. ક્યારેક નેગેટીવ પબ્લીસીટી ફિલ્મને ખૂબ સારો ધંધો અપાવી જાય છે તો ક્યારેક ખરાબ છાપ પણ છોડી જાય છે જેના કારણે ફિલ્મમાં એક લીમીટેડ વર્ગના પ્રક્ષકો જ જોવા મળે છે. ’હન્ટર’ ખૂબ ટૂંકા ગાળામાં શૂટ થયેલ ફિલ્મ હતી અને અચાનક જ તેને માર્કેટમાં મૂકી દેવામાં આવી. અનુરાગ કશ્યપ જે રીતે ખૂબ સારો ડિરેક્ટર છે એ રીતે જ હવે ખૂબ સારો બીઝનેસમેન પણ થતો જાય છે. આ કારણથી જ ફિલ્મના ટ્રેલર પહેલા ટીઝર રીલીઝ કરવામાં આવ્યું. આ ટીઝરમાં ફિલ્મમાં વપરાતો મુખ્ય શબ્દ ’વાસુ’નો અર્થ સમજાવવામાં આવ્યો અને એ સાથે જ યુ-ટ્યુબ પર હીટ વધવા લાગી. લોકો ટીઝર જોઈને હસ્યા છે અને ટ્રેલર જોવા પ્રેરાયા છે. ટ્રેલરની અંદર ખુલ્લી રીતે બોલવામાં આવતી ગાળ ફિલ્મમાં છૂપાવી દેવામાં આવી છે. પણ જો ખરા અર્થમાં ફિલ્મનો હાર્દ પકડો તો જે સંબંધોની વાત કરવામાં આવી છે એ માટે આપણે કહેવું પડે કે હળવી વાત સાથે મોટો શિકાર કરવામાં આવ્યો છે...

        હર્ષવર્ધન કુલકર્ણીનું કદાચ આ પહેલું ડિરેક્શન છે. ફિલ્મનો સ્ક્રીનપ્લે પ્રજવ્વલ જોશીનો છે પણ વાર્તા હર્ષવર્ધનની જ છે. સ્ક્રીનપ્લેની રમત ખૂબ સરસ રીતે કરવામાં આવી છે પણ વધુ પડતો સારો સ્ક્રીનપ્લે બતાવવા જતા અલગ અલગ સમયની વાતને લીંક કરવામાં ઘણી થાપ ખાધી છે. બાળપણ, કોલેજ કાળ અને પરિપકવતા વચ્ચે રમાતી આખી રમત જે રીતે આગળ પાછળ લઈ જવામાં આવી છે તે વાર્તાની જ ખૂબી કહી શકાય. કોઈ પણના જીવનમાં ફિલ્મમાં આવતા પ્રસંગો નહીં બન્યા હોય એવું નહીં જ હોય અને જ્યારે મોસ્ટ કોમન વાતને રજૂ કરવી હોય ત્યારે જ સારા ડિરેક્શનની જરૂર પડે કેમ કે આ ઘટના પ્રેક્ષકના પોતાના સાથે જોડાતી હોય છે. હું ખૂબ સારુ ડિરેક્શન નહીં કહું પણ હર્ષવર્ધનના ડિરેક્શનને ખરાબ તો કહી શકાય એમ જ નથી....

        ગુલશન દેવૈયાને મુખ્ય પાત્ર એટલે કે ફિલ્મનો વાસુ એટલે કે મનહર પોંકસેને આપવામાં આવ્યું છે. ગુલશન આમ તો અનુરાગ કશ્યપની જ શોધ છે. ’ધ ગર્લ વીથ યલ્લો બૂટ’ તેની પહેલી ફિલ્મ હતી. આ પછી ગુલશને આઠ દસ ફિલ્મ કરી છે જેમાંથી બધાને યાદ હોય એવી કહેવી હોય તો ’ગોલીયોં કી રાસલીલા-રામલીલા’. આ ફિલ્મમાં તેને ખરા અર્થમાં લીડ કેરેક્ટર મળ્યું કહી શકાય. ફિલ્મમાં તેના ત્રણ શેડ છે. એક એક દમ રમતિયાળ છોકરો, બીજો કોલેજમાં ભણતો યુવાન અને ત્રીજો નોકરી કરી ઇમોશન સાથે જોડાયેલો વ્યક્તિ. આ ત્રણ શેડને જો જુદા કરીને જુઓ તો ખબર પડે કે ખૂબ સારી રીતે તેણે પોતાના પાત્રને નિભાવી જાણ્યું છે. ગુલશનની સામે રાધીકા આપ્ટે ત્રીપ્તી નામ સાથે એક મોડર્ન યુવતીનું પાત્ર ભજવે છે. રાધીકા ૨૦૦૫માં ’વાહ લાઇફ હો તો ઐસી’ ફિલ્મ સાથે ઇન્ટ્રોડ્યૂસ થઈ હતી. આ પછી અત્યાર સુધીમાં લગભગ ૨૫ ફિલ્મ્સ કરી ચૂકી છે. મને દરેક વાર રાધીકા વધારે ને વધારે સારી આર્ટિસ્ટ લાગી છે. મોડર્ન યુવતિઓની જે  બે કોમન વાત છે, એક તો લવ મેરેજ કે એરેન્જ મેરેજ અને બીજી વાત એ કે આગલા લવ ક્રશ માંથી કેવી રીતે બહાર આવવું એ બંને વાતને ખૂબ જ સારી રીતે રાધીકા રજૂ કરી શકી છે. રાધીકાના ફિલ્મના એન્ડ પર જતા એક જ વાતના બે પ્રકાર રજૂ કર્યા છે જે એકબીજાથી તદ્દન વિરુધ્ધ છે અને આવા સંજોગોમાં જ આર્ટિસ્ટ શું રજૂ કરી શકે છે તે જોવાતું હોય છે. સાંઈ તમાંકર યુવા અવસ્થામાં સામે રહેતા પાડોશીની પત્ની છે. સાંઈ પણ કદાચ અનુરાગ કશ્યપ દ્વારા જ ફિલ્મ ઇન્ડસ્ટ્રીમાં ઇન્ટ્રોડ્યૂસ થઈ છે. સાંઈની પહેલી ફિલ્મ ૨૦૦૮માં ’બ્લેક & વ્હાઇટ’ હતી. સાંઈ પણ લગભગ ૩૦ જેટલી ફિલ્મ્સ કરી ચૂકી છે. ’ગજની’માં નાનો પણ ખૂબ સારો રોલ સાંઈએ ભજવ્યો હતો. સાંઈનું જેણે પણ આ ફિલ્મ માટે કાસ્ટીંગ કર્યું હશે એ પરફેક્ટ કર્યું છે. ગુલશન સાથે જોડાનાર પહેલી છોકરી એટલે કે વિરા સક્શેના જાડી હોવા છતા એક જ સારા ડાયલૉગ સાથે ઘણા માર્ક લઈ ગઈ. ફિલ્મના અન્ય પાત્રો ખાસ જાણીતા નથી પણ જે ટૂંકુ કામ પણ હોય તે પણ તેમના પાત્રને ન્યાય આપી શક્યા છે....

        આમ તો આ ફિલ્મને બનાવવાનો કોઈ ખાસ ખર્ચ નહીં થયો હોય પણ પ્રોડ્યૂસર્સ તરીકે કીરીટ નાખવા, રોહિત ચૂંગાણી, કેતન મારૂ, વિકાસ બહલ, વિક્રમાદિત્ય મોટવાણી અને અનુરાગ કશ્યપના નામ આપવામાં આવ્યા છે. જોહન જેકોબની સિનેમેટોગ્રાફી છે. બહુ જ નાના અને ઓછા લોકેશનમાં તેમણે કેમેરાને ખૂબ સારી રીતે રમાડ્યો છે. પ્રોડક્શન કંપની તરીકે ટેલરમેડ ફિલ્મ્સ અને ફેન્ટમ ફિલ્મ્સ, શેમારુ એન્ટરટેઇન્મેન્ટ અને ફાલ્કોને આપવામાં આવી છે. ફિલ્મનું ડીસ્ટ્રીબ્યુશન પણ શેમારુ એન્ટરટેઇન્મેન્ટ એ જ સંભાળ્યું છે. મ્યુઝિક ખામોશ શાહનું છે. કંઈ ખાસ કહી શકાય એવું મ્યુઝિક નથી પણ ફિલ્મ પ્રમાણે ઓકે છે...

        ફિલ્મને મુલવતા પહેલા ફિલ્મ વિશેના થોડા મહત્વના પોઇન્ટ્સની વાત કરી લઈએ. ફિલ્મની વાત જ એક એવા વ્યક્તિની છે જે સ્ત્રીઓને પટાવવામાં જ સમય કાઢે છે અને તેના માટે રોજ નવો શિકાર એ એક શોખ છે. હવે જો આ જ વિષય હોત તો ફિલ્મ માત્ર અને માત્ર સેક્સ પર આધારિત હોવી જોઈતી હતી પણ ફિલ્મમાં માત્ર આ વાત છે એમ કહી જ ન શકાય. જ્યારે બીજી તરફની વાત ગણીએ તો બચપણથી સાથે રહેતા કઝીન્સ એક બીજા સાથે ખૂબ પ્રેમથી રહે છે. મીલ્ટ્રીમાં કામ કરતો હીરોનો કઝીન ખૂબ બધી છોકરીઓ ફેરવે છે અને એક એકદમ સામાન્ય લાગતી છોકરીના પ્રેમમાં પડે છે અને લગ્ન કરે છે તો શું વાર્તાનો ધ્યેય એ હતો કે પ્રેમ પાસે સેક્સ પણ પાંગળો છે? આ સાથે જ એક સરસ લવ સ્ટોરી હીરોની પણ ચાલે છે. એરેંજ મેરેજ માટે એ એક છોકરીને મળે છે અને તેનો સતત સાથ ઝંખતો રહે છે. તેને પણ ખબર નથી કે આ પ્રેમ છે કે શું છે! હીરોને બીજી છોકરીઓ શોધતો બતાવ્યો છે પણ હીરોઇન પર તેણે ક્યારેય પ્રયત્ન નથી કર્યો તો શું વાતનો મુખ્ય ધ્યેય પ્રેમ જ ગણી શકાય? હીરોના ભાઈને એક છોકરી જે હાયપોથેટીક પાત્ર છે તેને પ્રેમ કરતો બતાવાયો છે તો શું ફિલ્મનો ધ્યેય એવો હતો કે એક જ પાત્રને જીવનમાં પ્રેમ થઈ શકે? એક છોકરી જે તેના આગલા પ્રેમીની એંગેજમેન્ટ પછી પણ એટલી જ કેર લે અને પોતાના ઘેર રાત રોકે તો શું ફિલ્મની વાત એવી હતી કે છોકરીઓ પોતાના પહેલા ક્રશને ભૂલી નથી શકતી? આવા તો એક એક મીનીટ પર તમને પ્રશ્ન થશે પણ વાર્તા તમારી નજીકથી નીકળતી દેખાશે માટે ફેમીલી સાથે ના જોઈ શકો તો એકલા જઈને પણ ફિલ્મ જોઈ લેજો. હાં થોડું વલ્ગર લાગશે પણ ’ગ્રાન્ડ મસ્તી’ જેટલી હલકટ ફિલ્મ તો નથી જ. ફિલ્મની કન્ફ્યુઝન વાળી વાતને પણ ખૂબ સરસ રીતે રજૂ કરી શકવા માટે ફિલ્મને ૩ સ્ટાર.....

પેકઅપ:

"ફિલ્મ એટલે બધાને ખુશ રાખવાનું માધ્યમ દા.ત. ’રા-વન’ ફિલ્મમાં શાહરૂખ ખાન દક્ષિણ ભારતીય છે પણ તેની અંતીમ વિધી ક્રીશ્ચયન પરંપરા મુજબ કરવામાં આવે છે અને પછી અસ્થી નદીમાં પધરાવવામાં આવે છે"

એન.એચ. 10: સારા હાઇ-વેનું ખરાબ ફિલ્મ

        ફિલ્મ ઇન્ડસ્ટ્રીનો એક વણ લખ્યો રુલ છે કે સ્પોટબોય તરીકે કામ કરતા વ્યક્તિને પણ એક દિવસ ડિરેક્ટર બનવાના સપના હોય, ત્યારે એક હીરો કે હીરોઇનને પ્રોડ્યૂસર કે ડિરેક્ટર બનવાનો કેમ શોખ ન હોય? આખરે એક માત્ર એવો ધંધો છે જે બહુ જ ટૂંકા ગાળામાં ગુણાકારમાં રૂપિયા કમાવીને આપે છે. જો તમે બજેટને સીમીત રાખી શકો અને રીલીઝ કરાવી શકો તો કોઈ પણ ફિલ્મ ખોટ નથી કરતી. ખોટ કરે છે તો ઑડિયન્સ. એક વાર તો પ્રચારને ધ્યાનમાં લઈને કે આર્ટિસ્ટને ધ્યાનમાં લઈને બચારા જોવા જાય જ અને પછી બહાર નીકળીને ફિલ્મ વખોડે કે વખાણે. ’એન.એચ. 10’ ખૂબ સારો હાઇ-વે છે પણ ફિલ્મનો આ રન કાપવો થોડો મુશ્કેલ પડે છે, ટૂંકમાં કહીએ તો સારા હાઇ-વેનું ખરાબ ફિલ્મ....

        નવદીપ સિંઘનું આમ ખરા અર્થમાં કહીએ તો સારા બૅનરમાં આ પહેલું ડિરેક્શન કહેવાય. આ પહેલા તેમણે અભય દેઓલને લઈને ’મનોરમા સીક્સ ફીટ અન્ડર’ ડિરેક્ટ કર્યું હતું અને પૂરા ૮ વર્ષ પછી તેમના ડિરેક્શનમાં આ બીજુ ફિલ્મ આવ્યું છે. એવું માની શકાય કે આ ૮ વર્ષ તેમણે તપસ્યા જ કરી હશે અને ડિરેક્શનના ઘણા પોઇન્ટ્સ આ ફિલ્મમાં તમે માણી જ શકશો પણ જ્યારે વાર્તા જ એટલી સ્લો હોય ત્યારે ડિરેક્શન સારુ હોવા છતા ઓવરઓલ ફિલ્મના માર્ક કપાય જ જાય...

        મોડેલ તરીકે અનુષ્કાની કેરિયર સારી રીતે આગળ વધી જ રહી હતી પણ અચાનક જ નસીબ ફર્યા અને તેની મુલાકાત આદિત્ય ચોપરા સાથે થઈ. આદિત્યને છોકરીમાં દમ લાગ્યો અને તરત જ તેની ફિલ્મ ’રબ ને બનાદી જોડી’ માટે સાઇન કરી લીધી. આ પછીની તેની ફિલ્મ ’બદમાશ કંપની’ હીટ નહોતી રહી પણ અનુષ્કા તો સારુ પર્ફૉર્મન્સ આપી જ શકી હતી. અનુષ્કાને ૨૦૧૦માં જ ’બેન્ડ બાજા બારાતી’નું રીલીઝ પણ મળ્યું. એવોર્ડ્સની વાત ન કરો તો પણ અનુષ્કાની એક્ટીંગનો ગ્રાફ સતત ઊંચો ચડતો જ જોયો છે. અનુષ્કાના દેખાવમાં પણ સતત સુંદરતાનો વધારો થતો જોવા મળ્યો છે. ’પીકે’ જેવી મોસ્ટ હીટ ફિલ્મની હીરોઇન બનવું એ પણ એક ક્રેડિટ જ કહેવાય. આ ફિલ્મમાં તો જ્યારે પોતે પ્રોડ્યૂસર હોય તો પછી પોતાને મળતી તક કેમ ગુમાવી શકાય! આ તકનો ઉપયોગ કરવામાં અને પોતાના પર જ કૅમેરા સ્થિર કરવામાં પોતાના એક્ટીંગના ઊંચા જતા ગ્રાફને પણ સ્થિર કરી દીધો. અનુષ્કા સામે નેઇલ ભૂપલમ કાસ્ટ કરવામાં આવ્યો છે. નેઇલની બોલીવુડ એન્ટ્રી ૨૦૦૬ની ફિલ્મ ’ઓફશોર’થી થઈ હતી અને ૨૦૦૯ સુધીમાં તેણે લગભગ ૩ કે ૪ ફિલ્મ્સ કરી ત્યાં સુધી કોઈ ઓળખતું નહોતું. તે્ને થોડી ઘણી ઓળખાણ મળી હોય તો ’મેરા દિલ લેકે દેખો’થી.  આ પછી ’નો વન કીલ્લ્ડ જેસ્સિકા’, ’ડેવિડ’, ’અગ્લી’ જેવી શાનદાર ફિલ્મ્સ પણ કરી. અનીલ કપૂરની ક્લાસ ટેલી સિરીઝ ’24’ માં તેણે પ્રાઇમ મીનીસ્ટરનો રોલ કર્યા પછી તો ખૂબ જ જાણીતો ચહેરો બની ગયો. આ ફિલ્મમાં હીરો તો હીરોઇન હતી એટલે જેટલું કામ મળ્યું તેને ન્યાય આપવાનો પ્રયત્ન કર્યો છે. દર્શન કુમારના એક નસીબ તો માનવા જ પડે કે તેનું બીજુ ફિલ્મ હોવા છતા ગ્રેટ હીરોઇન્સ સાથે કામ કરવા મળ્યું છે. આ પહેલાનું તેનું ફિલ્મ ’મેરી કોમ’ પ્રિયંકા ચોપરા સાથે હતું અને આ ફિલ્મ અનુષ્કા સાથે. જો કે દર્શન છેલ્લા ૫ વર્ષથી સહજ થિયેટર ગૃપ સાથે જોડાયેલો છે. સ્ટેજના આર્ટિસ્ટના એક્ટીંગ માટે વધારે કંઈ કહેવાની જરૂર જ ન હોય આ ફિલ્મમાં તો બસ ભગાવ્યે રાખ્યો છે અને કોઈ ખાસ કામ પોતાના હિસ્સામાં ન હોવાથી કોઈ કૉમેન્ટ થઈ શકે એમ નથી. દિપ્તી નવલ ખૂબ નાના રોલમાં છે પણ સાચે જ સરસ કામ કર્યું છે....

        સાંભળવા મળ્યું છે કે આ ફિલ્મ અંગ્રેજી ફિલ્મ ’ઇડન લેક’ની બેઠી ઉઠાંતરી છે. અરે ત્યાં સુધી કે પોસ્ટર પણ ’બ્લેક વિડોવ’ પરથી ઉઠાવવામાં આવ્યું છે! સપ્ટેમ્બર, ૨૦૧૪માં રીલીઝ કરવાના ટાર્ગેટ સાથે ફિલ્મનું શૂટ જાન્યુઆરી ૨૦૧૪માં શરૂ કરવામાં આવ્યું પણ કોણ જાણે જ્યારે લેટ થવાનું હોય ત્યારે ગમે તેમ લેટ થતું જ રહે છે. ફિલ્મને ઘણા વિઘ્નો નડ્યા જેમ કે ૧૮ એપ્રિલ, ૨૦૧૪માં જયપૂરના શૂટ દરમિયાન સેન્ડ સ્ટ્રોમ આવ્યું અને પૂરા ૫ દિવસ સુધી શૂટ બંધ રહ્યું હતું. આમ લેટ થતા થતા છેવટે ૬ માર્ચ ફિલ્મ રીલીઝ કરવાનું નક્કી કરવામાં આવ્યું ત્યાં સેન્સર બોર્ડને વાંધો પડ્યો! સેન્સર બોર્ડના કહેવા પ્રમાણે ૮ કટ પછી ફિલ્મને રીલીઝ કરવા દેવામાં આવ્યું છે જ્યારે અનુષ્કાના કહેવા પ્રમાણે ૨ કટ જ સ્વીકારવામાં આવ્યા છે. હવે બે માંથી ગમે તે સાચું હોય પણ ફિલ્મ તો આ કારણોથી ૧૩ માર્ચ જ રીલીઝ થઈ શકી અને એ પણ ’A' સર્ટીફીકેટ સાથે...

        ફિલ્મને વખોડવા બેસીએ તો એટલાં બધા પોઇન્ટ્સ છે કે ગણવા પણ અઘરા પડે! ઇન્ટરવલ સુધી ફિલ્મમાં કહી શકાય એવી એક જ ઘટના બને છે. ઘટના મુજબ એક ધાબા પર જમવા બેઠેલાં અનુષ્કા અને નેઇલ સામે દર્શન કુમાર તેની બહેનને મારી રહ્યો છે અને નેઇલ વચ્ચે પડતા તેને થપ્પડ ખાવી પડે છે. આ ઘટના પછી પોતાની હીરોગીરી દેખાડવા દર્શનની પાછળ જાય છે અને દ્ગશ્ય જોતા જ ભાગવા માંડે છે. હવે જો થપ્પડ ઇશ્યૂ હોય અને પાસે બંદૂક હોય તો ડરવાની વાત જ ક્યાં આવે છે? અને જો એટલી હિમ્મત હોય તો ત્યાં પણ જવાબ આપી શક્યો હોત. ચલો ઇન્ટરવલ પછી આગળ વધીએ તો બસ ભાગવાનું જ છે અને એક પછી એક વાત બહુ જ એક્સ્પેક્ટેડ આવે છે. પોલીસ સ્ટેશને જતી અનુષ્કાને ઇન્સ્પેક્ટર લઈને જાય ત્યાં જ ખબર પડે કે મળેલો નીકળશે. આ રીતે જ સરપંચનું ઘર શોધીને તેના ઘેર પહોંચે ત્યારે પણ એક્સ્પેક્ટેડ જ હોય કે આ દર્શનનું જ ઘર નીકળશે અને એ પણ એટલી જ સરસ રીતે ખબર પડે કે નેઇલ મરી જશે, ત્યારબાદ અનુષ્કા ચંડી ચામુંડા થઈને બધા ગુંડા પાર્ટીને મારી નાખશે. હવે આટલી જ વાત માટે આખું ફિલ્મ જે રીતે સમય બગાડે છે એ સહન કરવો અઘરો છે. જો રાઇટર સુદીપ શર્માની ક્રીએટીવીટી હોત તો આ ભાગવું પણ વધારે ઇન્ટરેસ્ટિંગ બનાવી શકાયું હોત....

        મ્યુઝિક ચક્રવર્તિ, સંજીવ-દર્શન, આયુષ શ્રેષ્ઠા, સવેરા મહેતા અને સમીરા કોપીકર જેવા પાંચ પાંચ મ્યુઝિક ડિરેક્ટર્સે મળીને તૈયાર કર્યું છે અને સારુ છે પણ ગીતોનું પ્લેસમેન્ટ ખૂબ જ ખરાબ છે. પ્રોડક્શન કંપનીની ક્રેડિટ ફેન્ટમ ફિલ્મ્સ અને ક્લિન સ્લેટ ફિલ્મ્સને આપવામાં આવી છે. પ્રોડ્યૂસર તરીકે અનુષ્કા ઉપરાંત વિક્રમાદિત્ય મોટવાણે, અનુરાગ કશ્યપ, વિકાસ બહલ, સુનીલ લુલ્લા, ક્રિશીકા લુલ્લાનું નામ આપવામાં આવ્યું છે. ઇરોઝ ઇન્ટરનેશનલ દ્વારા રીલીઝ કરવામાં આવ્યું છે. ફિલ્મને તેની મહેનત, લાઇટીંગ, કૅમેરા વર્ક માટે જ ૨ સ્ટાર આપી શકાય....

પેકઅપ:

"આલિયા ભટ્ટ સ્વાઇનફ્લુના માશ્ક પણ દુપટ્ટા મુજબ મેચીંગ કલરના શોધવા નીકળી હતી..."