કાય પો છે: માણવા લાયક ફિલ્મ

          ચારે તરફ ઘોંઘાટ, દેકારો, ચિચિયારીઓ, ચીકી, જીંજરા, શેરડી અને એથી પણ વિશેષ લોકોના ચહેરા પર છવાયેલા આનંદને માણવા માટે ગુજરાત પધારવું પડે. એમાં પણ અમદાવાદ, સુરત અને બરોડા તો ઉતરાણ પછી વાસી ઉતરાણનો માહોલ પણ અનેરો હોય છે. આ આનંદની પરિસીમા એટલે જોરથી આવતો અવાજ ’કાયપો છે’. આમ તો એકબીજાની કાપવી એ આજકાલ સામાન્ય વાત છે પણ જ્યારે મકરસંક્રાંતિ પર પતંગ કાપો ત્યારે આવી કોઈ દુશ્મનાવટ જોવા મળતી નથી. ધાબા પર ચડેલો માણસ હિન્દુ છે કે મુસ્લિમ એવો સવાલ પણ ઊભો થતો નથી પણ જો આ માહોલમાં રાજકારણ ભળે તો? ચેતન ભગતની નોવેલ પરથી ઘણી બધી ફિલ્મ્સ ઇન્સ્પાયર થઈ છે. ચેતન ભગતની કલમ જે રીતે વાત રજૂ કરે છે એ વખાણ કરવા લાયક જ છે. ચેતન ભગતની નોવેલ ’થ્રી મેસ્ટેક્સ ઑફ માય લાઇફ’ જેની અત્યાર સુધીમાં ૪૨૦૦૦૦ કોપી વેચાય ચૂકી છે. આ આંકડામાં મુંબઈની ફૂટપાથ પર મળતી પાયરેટેડ કોપીનો હિસાબ ઉમેરવામાં આવે તો આંકડો ક્યાં પહોંચે એનો અંદાજ લગાવવો મુશ્કેલ બને. આ નોવેલ પરથી બનેલી માણવા લાયક ફિલ્મ એટલે ’કાય પો છે’

        નોવેલ અને ફિલ્મમાં ઘણો બધો ફેર છે. નોવેલ સરળતા મુજબ પ્રસંગોથી જોડાયેલી હોય છે અને તેમાં વર્ણન કરી શકાય છે. નોવેલમાં લખી શકાય કે ’ભમરો ફૂલ પર બેઠો’ પણ જો આ વાત ફિલ્મમાં લેવાની હોય તો? આ દ્ગશ્ય દેખાડવા માટે કેમેરો કયા એંગલ પર રહેશે? સમય શું હશે? કેટલી લાઇટ્સ લાગશે? આવા ઘણા બધા પ્રશ્નો પર કામ કરવું પડે. આ કારણથી જ લોકોની દ્રષ્ટિએ ભલે નોવેલ પરથી ફિલ્મ બનાવવી સહેલી હોય પણ ખરેખર ખૂબ જ અઘરું કાર્ય છે. એટલે જ આ નોવેલને ફિલ્મમાં બદલવા માટે પ્રભાલી ચૌધરી, સુપ્તીક સેન, અભિષેક કપૂર અને ચેતન ભગતે પોતે પણ સ્ક્રીનપ્લે લખ્યા છે. નોવેલને પૂરતો ન્યાય તો જ મળે જો સ્ક્રીનપ્લે મજબૂત હોય. ફિલ્મમાં સ્ક્રીનપ્લે પર ખૂબ મહેનત થઈ છે એ દેખાય આવે છે. જો કે હવે એક રિવાજ થઈ ચૂક્યો છે કે ફિલ્મના સ્ક્રીનપ્લે પર ડિરેક્ટર કામ કરતા જ હોય છે પણ સાંભળવા મળ્યું છે કે ડિરેક્ટર અભિષેક કપૂર આ ફિલ્મના સ્ક્રીનપ્લેની દરેક બેઠકમાં હાજર રહ્યા હતા. અભિષેકને શોખ તો હતો એક્ટીંગનો એટલે એમણે પડદા પર પદાર્પણ કર્યું હતું ’આર્યન’ ફિલ્મમાં હીરો તરીકે. સુપર ફ્લોપ ફિલ્મ બનાવો ત્યારે તમે ઘણું શીખો છો. કદાચ આ શીખથી જ અભિષેક સારા ડિરેક્ટર બન્યા હશે. અભિષેકના ડિરેક્શનનો ચમકારો ’રોક ઓન’માં થોડો ઘણો જોવા મળ્યો હતો. ’રોક ઓન’ માટે એમને ફિલ્મફેર એવૉર્ડ પણ મળ્યો. એક ખાસ વર્ગને ’રોક ઓન’ ખૂબ જ ગમી હતી. પૂરતો સમય લીધા પછી અભિષેકે ’થ્રી મીસ્ટેક્સ ઑફ માય લાઇફ’ એડપ્ટ કરી. નોવેલ તો મેં પહેલા જ વાંચેલી એટલે મનમાં ઘણી શંકાઓ સાથે ફિલ્મ જોવા ગયેલો પણ પ્રમાણમાં અભિષેકના ડિરેક્શન અને સારા સ્ક્રીનપ્લેના વખાણ કરવા જ પડ્યા.

        ફિલ્મ માટે મોટા સ્ટાર પસંદ કરી શકાયા હોત પણ સાવ સામાન્ય લેવલના કલાકારોને લેવાનું નક્કી કરવામાં આવ્યું પણ એક વાતનું ખાસ ધ્યાન રાખવામાં આવ્યું છે કે એક પણ આર્ટિસ્ટ એક્ટીંગની દ્ગષ્ટિથી નબળો ન હોવો જોઈએ. નોવેલમાં મુખ્ય પાત્રનું નામ ગોવિંદ છે પણ ફિલ્મમાં આ પાત્રની જગ્યાએ ઇશાનને વધારે મહત્વ આપવામાં આવ્યું છે. ઇશાન એટલે સુશાંત સીંઘ રાજપૂત. આમ તો આ છોકરો એન્જીનીયર છે પણ ફિલ્મ એવો વિષય છે કે સારા સારાને ઘેલું લગાડી શકે. 'રાઝ-2' માં મોહિત સુરીની સાથે સુશાંત આસિસ્ટન્ટ ડિરેક્ટર રહી ચૂક્યો છે.  આ સાથેસાથે ટેલિવિઝનની દુનિયામાં પણ સુશાંતના પગલા પડી ચૂક્યા હતા. ’કીસ દેશ મેં હૈં મેરા દિલ?’ બાલાજીની ટી.વી. સિરિયલથી એક્ટીંગની શરૂઆત કરી અને એ પછી ’પવિત્ર રીસ્તા’ સિરિયલમાં એની એક્ટીંગના ખૂબ જ વખાણ થયા. ફિલ્મની વાત કરીએ તો આ સુશાંતનું પહેલું ફિલ્મ જ છે પણ સાંભળવામાં આવ્યું છે કે યશરાજ બેનરની આદિત્ય ચોપરા દિગ્દર્શીત એક અન ટાઇટલ ફિલ્મમાં પણ એને લેવામાં આવ્યો છે જેનું શુટીંગ શરૂ થવાની તૈયારીમાં છે. રાજકુમાર હીરાણી ’પીકેય’ ફિલ્મમાં માટે પણ સુશાંત સાઇન થઈ ચૂક્યો છે. ફિલ્મનું બીજુ પાત્ર છે ઓમી એટલે અમીત સાધ. અમીત ન્યુયોર્કમાં બે વર્ષનો એક્ટીંગ કોર્સ કરીને આવ્યો ત્યાર પછી ફિલ્મ માટે સ્ટ્રગલ કરી રહ્યો હતો. અમીતની કેરિયરની શરૂઆત ’ફૂંક2’ ફિલ્મમાં કામ મળ્યું. આ ઉપરાંત ’મેક્સીમમ’માં પણ જર્નાલિસ્ટ તરીકે જોવા મળ્યો હતો. આ ઉપરાંત ’ક્યોં હોતા હૈં પ્યાર?’ સિરિયલમાં પણ કામ કર્યું. આ ફિલ્મ કદાચ અમીતની કેરિયરમાં નવો વળાંક આપી શકે. રાજકુમાર યાદવ એટલે ફિલ્મમાં ગોવિંદ માટે તો કહેવું જ શું? છોકરો ધીમેધીમે એટલો બધો એસ્ટાબ્લીસ થઈ રહ્યો છે કે ધીમેધીમે દર ચાર ફિલ્મ મૂકીને જોવા મળી રહ્યો છે. એક્ટીંગનો તો એક્કો છે આ બંદો. ’રાગિણી એમ.એમ.એસ.’ ફિલ્મ માત્ર બે પાત્રો પર જ હતું. હવે જો સ્ટ્રોંગ આર્ટિસ્ટ ન હોય તો કેમ ચાલે? રાજકુમાર યાદવ ફિલ્મ ખેંચવામાં સફળ રહ્યો હતો. આ ફિલ્મમાં પણ પોતાના પાત્રને પૂરેપુરો ન્યાય આપી શક્યો છે. ફિલ્મમાં વિદ્યાનું પાત્ર ભજવતી અમ્રીતા પૂરી ગર્ભ શ્રીમંત છોકરી છે. અમ્રીતાના પિતા આદિત્ય પૂરી એચ.ડી.એફ.સી. બેંકના ડિરેક્ટર છે. ૨૦૧૦માં ’આઇશા’માં અમ્રીતા કામ કરી ચૂકી હતી. જો કે અમ્રીતાના નસીબ થોડા ખરાબ એટલે ’ફિલ્મફેર’, ’ઝી સીને એવૉર્ડ’ અને ’સ્ટાર સ્ક્રીન એવૉર્ડ’ બધામાં નોમીનેશન મળ્યું પણ એવૉર્ડ નહીં. ’બ્લડ મની’માં પણ અમ્રીતાએ રોલ કર્યો હતો. અમ્રીતા ફિલ્મમાં એકદમ છવાઈ ગઈ છે. માનવ કોલને બીટ્ટુ મામા તરીકે ફિલ્મમાં ઇન્ટ્રોડ્યુસ કરવામાં આવ્યા છે. ફિલ્મમાં નેગેટિવ પાત્ર ભજવવું સૌથી અઘરું હોય છે પણ માનવે યોગ્ય ન્યાય આપ્યો છે. મને સૌથી વધુ કામ ગમ્યું હોય તો ફિલ્મમાં બાળકલાકાર અલીનું પાત્ર. અલી એટલે દિગ્વિજય દેશમુખ. ખૂબ ઓછા ડાયલૉગ પણ આંખોથી અભિનય કરતો આ બાળકને જોવો એ લહાવો છે.

        ફિલ્મની સિનેમેટોગ્રાફી અનય ગોસ્વામીને સોંપવામાં આવી છે. અમુક દ્ગશ્યો તો એટલાં બધાં સારી રીતે શૂટ કરવામાં આવ્યા છે કે વાહ બોલવું જ પડે. અનયની મારા ખ્યાલ મુજબ આ ત્રીજી ફિલ્મ જ છે. આ પહેલા શૉર્ટ ફિલ્મ ’ચાબીવાલી પોકેટ વોચ’ માટે અનયને કોડાક એવૉર્ડ-એશિયા પેસીફીક માટે મળેલો. રાહુલ બોઝ અને રાઇમાં સેન અભિનીત ફિલ્મ ’જાપાનીઝ વાઇફ’ ભાગ્યે જ કોઈએ જોઈ હશે પણ આ ફિલ્મના સિનેમેટોગ્રાફર પણ અનય ગોસ્વામી જ હતા. જો હું ભૂલતો ન હોઉં તો આ ફિલ્મ માટે પણ અનયને કોઈ એવૉર્ડ મળેલો. અમીત ત્રીવેદીના મ્યુઝિકનો હું તો પહેલેથી જ આશિક રહ્યો છું અને એમાં પણ ગુજરાતી બંદાને ગુજરાતી માહોલની ફિલ્મ મળે તો પૂછવું જ શું? કોઈ ખોટો ઘોંઘાટ કે સોર સરાબા વગરનું મ્યુઝિક સાંભળવું ગમે એવું છે.

        અમદાવાદના માહોલ અને ૨૦૧૦ની ગુજરાતમાં બનેલી બે મોટી ઘટનાઓ સાથે આગળ વધતી વાર્તા પણ અનોખી છે. ફિલ્મના દરેક પાત્રોની વિચારસરણી અલગ છે પણ બધા જ એકબીજા સાથે જોડાયેલા છે. અહીં કોણ સાચું છે કે ખોટું એના પ્રશ્ન કરતા ઘટનાઓ વધારે મહત્વની બની જાય છે. ૨૦૦૧ના ભૂકંપ અને ૨૦૦૨ના ગોધરા કાંડને ફિલ્મમાં વણી લેવામાં આવ્યો છે.  ભારતમાં ક્રિકેટ સૌના રસનો વિષય રહ્યો છે માટે ફિલ્મમાં સપ્લીમેન્ટ તરીકે ક્રિકેટને પણ વાપરવામાં આવ્યું છે. અમદાવાદ, વડનગર, પોરબંદર અને દિવ એટલે કે આખુ ફિલ્મ ગુજરાતમાં જ શૂટ કરવામાં આવ્યું છે. અમદાવાદની પોળનો ઓરીજીનલ માહોલ જોઈને અમદાવાદીઓ ખુશ થશે જ. જ્યારે પણ પૈસા આવે ત્યારે પહેલો વિચાર દિવ જવાનો આવે. આ ફિલ્મમાં પણ દિવ ફરવા જતા ત્રણે મિત્રો તો જોવા ગમશે જ પણ સુંદર સિનેમેટોગ્રાફીને લીધે તમને દિવ વધારે ગમવા લાગશે. હું તો આવતા અઠવાડિયે જવાનું વિચારુ જ છું ;). આમ તો આ ફિલ્મને કોમર્સિયલ કેટેગરીમાં મૂકી ન શકાય માટે સ્ટાર આપવા એ યોગ્ય છે કે નહીં એ ખબર ન હોવા છતા હું ફિલ્મને ૪ સ્ટાર આપીશ. ’જિલ્લા ગાજીયાબાદ’ પણ આજે જ રીલીઝ થયુ છે. જોઈએ બોક્ષ ઓફીસ કોના પર વારી જાય છે!

પેકઅપ:

ભિખારી

"સાહેબ પાંચ રૂપિયા આપોને’

અમદાવાદી

"મારી પાસે સો રૂપિયા છે. તારી પાસે છૂટ્ટા છે?"

ભિખારી

"હાં"

અમદાવાદી

"અલ્યા તો પહેલા એ જ વાપરને બકા..."

મર્ડર 3: ફિલ્મનું મર્ડર

       

         ૨૦૦૪ની એપ્રિલમાં જ્યારે પહેલીવાર ’મર્ડર’ રીલીઝ થયું ત્યારે કદાચ પ્રોડ્યુસર્સને પણ ખબર નહીં હોય કે ફિલ્મ આટલી હદે લોકોને પસંદ પડશે! એકદમ ઓછાં બજેટમાં બનેલી ફિલ્મ જ્યારે બે અઠવાડિયામાં ૮૦ કરોડનો ધંધો કરે ત્યારે આશ્ચર્ય જ થાય! ’મર્ડર’ જોવા ગયેલા દર્શકોને માત્ર મલ્લિકા શેરાવતનું શરીર જ નહીં પણ ફિલ્મ પણ ગમી હતી. ફિલ્મનું મ્યુઝિક આજની તારીખ સુધી કર્ણપ્રિય છે. વાર્તાને જે રીતે ગીલ્ટ અને હકીકત વચ્ચે રમાડવામાં આવી હતી એ રીતે ફિલ્મને હીટ થવાનો પૂરો અધિકાર હતો. કેમ ન હોય? સ્ટોરી અને ડિરેક્શન અનુરાગ બસુનું હતું. જો ફિલ્મ હીટ ગઈ હોય તો સીક્વલ આવે જ એ વાત પ્રેક્ષકો માટે પણ એક્સ્પેક્ટેડ હોય. આ પછી વારો આવ્યો ’મર્ડર 2'નો. જુલાઈ-૨૦૧૧માં જ્યારે ’મર્ડર 2’ રીલીઝ થઈ ત્યારે લગભગ લોકો ’મર્ડર’ની જેમ જ ઘણું જોવા મળશે એવી આશાથી ફિલ્મ જોવા ગયા હતા. ફિલ્મમાં એમની એવી ખાસ આશાઓ તો પૂરી ન થઈ પણ પ્રશાંત નારાયણ જેવો ખતરનાક વિલન જોઈને લોકો રાજી થયા. ડિરેક્શનનો દોર આ ફિલ્મ વખતે મોહિત સુરીને સોંપવામાં આવ્યો હતો. ફિલ્મની કથા મહેશ ભટ્ટે જ લખી હતી. સંપૂર્ણ અપેક્ષા પર ખરી ન ઊતરી પણ વિલન માટે તો ફિલ્મ જોવા જેવી હતી જ. બીજી ફિલ્મ પણ પ્રમાણમાં સારો ધંધો કરી શકી હતી એટલે ત્રીજીની રાહ જોવાતી જ હતી.  ’ મર્ડર 3’ પાસે મનોરંજન તો પરસશે એવી આશા પણ ઠગારી નીકળી. ’ મર્ડર 3’ એટલે બીજુ કંઈ નહીં પણ ફિલ્મનું મર્ડર...

        આ પહેલાની ફિલ્મની બંને સીક્વલમાં ઇમરાન હાસમીને લેવામાં આવ્યો હતો જ્યારે આ ફિલ્મમાં રણદીપ હુડાને લેવામાં આવ્યો. ભટ્ટ કૅમ્પને પૂછતા એવો જવાબ મળ્યો હતો કે ’આ સ્ટોરી મુજબ ઇમરાન ફીટ નહોતો અને પ્રેક્ષકોને કંઈક નવીન આપવું હતું માટે રણદીપને લેવામાં આવ્યો’. આ જ કૅમ્પના બીજા મેમ્બર પાસેથી એવું સાંભળવા મળ્યું કે ’ઇમરાન પાસે બીજી ફિલ્મ્સ હતી અને ઇમરાન ડેટ્સ ફાળવી શકે તેમ ન હતો માટે રણદીપને લેવામાં આવ્યો’ પણ ફિલ્મ ઇન્ડસ્ટ્રીના અમુક મિત્રોનું કહેવાનો ભાવાર્થ એવો નીકળતો હતો કે વાર્તા વાંચીને ઇમરાને સ્પષ્ટ ’ના’ પાડી હતી. હવે સાદુ શું એ તો મહાદેવ જાણે અને કાં મહેશ જાણે!. ફિલ્મની વાર્તા મહેશ ભટ્ટે લખી છે અને દિગ્દર્શન વિશેષ ભટ્ટને સોંપવામાં આવ્યું છે. આમ જુઓ તો આખો ઘરનો ડાયરો હોય તો રૂપિયા તો બચે પણ ફિલ્મનો ઓટલો વળી જાય એનો વાંધો નહીં! ’દિલ્હી 6’, ’યે સાલી જિંદગી’, ’રોકસ્ટાર’ જેવી ફિલ્મમાં નાના મોટા પાત્રો ભજવી ચૂકેલી અદિતિ રાવ હૈદરી અને મૂળ પાકિસ્તાની સિરિયલની આર્ટિસ્ટ અને એક હિન્દી ફિલ્મ ’કજરારે’માં દેખાય ચૂકેલી સારા લોરેનને લેવામાં આવી. સારાના હિસ્સામાં થોડી કીસ, થોડા બેડ સીન્સથી વધારે કંઈ જ નહોતું તો પણ બચારી બરાબર ન કરી શકી. અદિતિ પાસે તો વધુ અપેક્ષા હતી જ નહીં અને અદિતિ ક્યારેય હીરોઇન મટીરિયલ મને નથી લાગી માટે એ વિષય પર વધુ લખવા જેવું લાગતું નથી. રણદીપ હુડા આ પહેલા નાના નાના પાત્ર પણ ખૂબ સારી રીતે નિભાવી ચૂક્યો છે પણ આ ફિલ્મમાં નથી અંડર એક્ટીંગ કરી શક્યો કે નથી પોતે કરવા ધારેલ ઓવર એક્ટીંગ કરી શક્યો. કારણ ડિરેક્શન હોય કે વાર્તા પણ રણદીપ રીતસર વેડફાયો છે. 

        ફિલ્મ માટે અતિ જરૂરી તત્વ એવું વાર્તા આ ફિલ્મમાં છે જ નહીં. રણદીપ વિદેશમાં જાનવરોના ફોટા પાડતો ફોટોગ્રાફર છે. રણદીપની પ્રેમિકા અદિતિ ત્યાં તેની સાથે છે. અચાનક જ રણદીપને એક ભારતીય કંપનીમાં મોડેલ ફોટોગ્રાફર તરીકે ઑફર મળે છે. લેખકને એટલી પણ ખબર નથી કે વાઇલ્ડ લાઇફ ફોટોગ્રાફી અને મોડેલીંગ ફોટોગ્રાફીમાં કેટલો ફેર છે. રણદીપને સાથ આપવા તેની પ્રેમિકા અદિતિ તેની સાથે ભારત આવવા તૈયાર થઈ જાય છે. આવતાની સાથે જ રણદીપને એક એટલો મોટો આલીશાન બંગલો આપવામાં આવે છે કે જોઈને તમે દંગ રહી જશો. અહીં લેખકને એ પણ ખબર નથી કે મોડેલીંગ કરતા કોઈ પણ ફોટોગ્રાફર પાસે આટલો શાનદાર બંગલો ખરીદવાની તાકાત ન હોય. બંને પ્રેમી યુગલ ખૂબ સરસ અને સુખેથી રહે છે પણ રણદીપને તેના કૅમ્પની એક હેરડ્રેસર સાથે વેનીટીમાં દારુ પીતો જોઈ અદિતિ ગુસ્સે થઈ જાય છે. કોઈ પણ પ્રકારના પૂર્વ બંધારણ વગર બંગલાની જૂની માલિક અંગ્રેજી લેડી આવે છે અને અદિતિની દુ:ખભરી દાસ્તાન સાંભળે છે. આ લેડી બંગલામાં રહેલુ એક ચોર તહેખાનું બતાવે છે. આ તહેખાના માંથી બહાર ચાલતી તમામ પ્રવૃત્તિ જોઈ શકાય પણ અંદર શું થાય છે એ બહારના માણસો જોઈ શકે નહીં. અદિતિ રણદીપની પરીક્ષા લેવા એક વીડિયો રેકૉર્ડ કરીને આ તહેખાનામાં ઘૂસી જાય છે પણ ઉતાવળને લીધે ચાવી બહાર જ રહી જાય છે. અદિતિ આ તહેખાનામાં છે જ્યારે બીજી તરફ રણદીપ અદિતિને ભૂલીને સારાના પ્રેમમાં પડી જાય છે. આ આખી વાર્તા ફ્લૅશ બેક અને કરંટ સ્ટેટમાં બતાવવામાં આવે છે. ફિલ્મમાં થોડું ફિલ્મી તત્વ ઉમેરવું પડે માટે રાજેશ શ્રીનાગપુરાને ઇન્સ્પેક્ટર તરીકે લેવામાં આવ્યો છે. વધારાનું ફિલ્મી તત્વ નાખવા માટે આ ઇન્સ્પેક્ટરને સારાનો જૂનો પ્રેમી બતાવવામાં આવ્યો છે. સૌથી સરસ વાત એ છે કે બાથરૂમના પાઇપ પર લાકડી મારીને સિગ્નલ આપે છે અને માત્ર એ સિગ્નલથી સારા સમજી જાય છે કે અદિતિ કાચ પાછળ કૈદ છે. લેખક માટે તો માત્ર સ્ક્રીનપ્લે જ લખવાનો પણ બચારા કલાકારોએ તો લોજિક વગરની વાતો પર એક્ટીંગ કરીને રીયલ બતાવવાનું એ સાચે જ ખૂબ અઘરું કાર્ય છે. મૂળ વાર્તામાં એક પણ એંગલથી કોઈ પણ પ્રકારનો દમ નથી આ કારણે જ ફિલ્મ સહન કરવી પડે છે. બાકી રણદીપ, અદિતિ કે સારા સાવ નબળા આર્ટીસ્ટ્સ તો નથી જ.

        મહેશ ભટ્ટ કૅમ્પમાં સૌથી વધુ સારી બાબત જોવા મળતી હોય તો ફિલ્મની સિનેમેટોગ્રાફી. એકથી એક ચડે એવા દ્ગશ્યો અને અઢળક લાઇટીંગના કારણે કોઈ પણ દ્ગશ્ય વિઝ્યુઅલી રીચ ન લાગે એવું બને જ નહીં. આ ઉપરાંત એમના ફિલ્મની બીજી ખાસિયત એ હોય છે કે ફિલ્મમાં સેક્સ ખૂબ સિફતથી અને સારી રીતે રજૂ કરવામાં આવે અને ત્રીજી ખાસિયત છે કે ફિલ્મનું મ્યુઝિક હંમેશા લોકપ્રિય હોય. ’ મર્ડર 3’ માં વિઝ્યુઅલી રીચનેસ તો જોવા મળી પણ વાતનો અર્થ બહાર ન નીકળ્યો. સેક્સ બતાવવાની કોશિશ ચોક્કસ થઈ પણ કંઈ જોવા ન મળ્યું અને રહી વાત મ્યુઝિકની તો એક ગીત ઠીકઠીક બાકી તો ગીતના નામે ફિલ્મનો સમય જ પસાર કરવામાં આવ્યો છે. અંગ્રેજી ફિલ્મ્સની જેમ હવે બોલીવુડ ફિલ્મ્સ પણ સમયમાં ટૂંકી થતી જાય છે. માત્ર ૧૦૦ મીનીટનો રનટાઇમ ધરાવતી આ ફિલ્મમાં વાર્તા વધીને ૨૦ થી ૨૫ મીનીટની જ છે. બાકીનો સમય માત્ર સાયલેન્ટ શોટ્સ, ગીત અને કારણ વગરની વાતમાં વેડફવામાં આવ્યો છે. જો સ્ટાર આપવાની વાત આવે તો મને એક પણ સ્ટાર આપવાની ઇચ્છા થતી નથી પણ સુનિલ પટેલની સિનેમેટોગ્રાફી માટે ૧ સ્ટાર આપી દઈએ. તમે તો સુજ્ઞ દર્શકો છો માટે કહી દઉં કે ડીવીડીનો ખર્ચ કરવો પણ આ ફિલ્મ માટે વાજબી નથી...

પેકઅપ:

"તમે તમારી પત્નીને છરી શા માટે મારી?"

"જજ સાહેબ, મારી પાસે બંદૂક નથી એટલે..."

સ્પેસિયલ છબ્બીસ: દરેક વખતે સારુ ક્રીએશન શક્ય નથી

       ફિલ્મનો મુખ્ય આધાર ફિલ્મની વાર્તા હોય છે. ઘણીવાર લોકો માને છે કે જો સારા સ્ટાર હોય તો ફિલ્મ સફળ થઈ જાય છે, આવું બનતું પણ આવ્યું છે તો પણ જો ફિલ્મની વાર્તા સારી હોય તો સોનામાં સુગંધ ભળે. નીરજ પાંડે પાસે એક ખૂબ સારી વાર્તા હતી. આ વાર્તા લઈને નીરજ ઘણી જગ્યાએ ફર્યો હતો પણ લોકોને વાત ગળે ઊતરતી ન હતી. નીરજે અતિ મહેનતને અંતે અમુક લોકોને તૈયાર કર્યા અને ’વેનસડે’ બનાવી. પહેલા અઠવાડિયામાં ફિલ્મ લગભગ ક્યાંય ચાલી નહોતી પણ અમુક બુધ્ધિજીવી વર્ગ આ ફિલ્મ જોવા ગયો હતો અને આ વર્ગે ચર્ચા શરૂ કરી. ધીમેધીમે મીડિયા પણ સાથે જોડાયું. દરેક સ્ટેટના સારા લેખકોએ ’વેનસડે’ પર ખાસ આર્ટીકલ્સ લખ્યા. બીજા વીકથી ફિલ્મ હીટ જવા લાગી. કારણ હતું એક શ્રેષ્ઠ અને નવી રીતની વાર્તા, નશીરુદ્દીન શાહ, અનુપમ ખૈર જેવા એક્ટર્સ અને નીરજ પાંડેનું એક્સ્ટ્રા ઓર્ડીનરી ડિરેક્શન. ’સ્પેસિયલ છબ્બીસ’ માટે પણ આવી જ આશા હતી પણ દરેક વખતે સારુ ક્રીએશન શક્ય નથી!

        ’વેનસડે’ની સક્સેસ પછી તરત જ નીરજે ’સ્પેસિયલ છબ્બીસ’ની કથા અને પટકથા લખી રાખી હતી. નીરજ રાતોરાત સેલીબ્રીટી બની ગયા હતા એટલે આ વખતે સાથ આપવા માટે કોઈને કોઈ તૈયાર થશે જ એવી નીરજને પૂરી આશા હતી પણ સમય પસાર થયો પૂરા ત્રણ વર્ષનો. આ પાછળના કારણો ઘણા હશે પણ મુખ્ય કારણ હતું અક્ષય કુમાર. ફિલ્મના લીડ રોલ માટે નીરજને અક્ષય જ જોતો હતો. અક્ષય પાસે ત્રણ વર્ષ સુધી સમય નહોતો. આ સમય દરમિયાન નીરજ પાસે પણ કોઈ પ્રોડ્યૂસર નહોતો. નીરજના અંગત સંબંધો પોન્ટી ચઢ્ઢા સાથે એટલે પોન્ટી આ ફિલ્મને રીલીઝ કરવા તૈયાર થયો અને થોડા પ્રોડ્યુસર્સ જોડે મીટિંગ કરાવી. નીરજે આ ફિલ્મ પણ લો બજેટ જ બનાવવી હતી પણ વાયાકોમ 18, ફ્રાયડે ફિલ્મ વર્કસ અને કુમાર મંગત જેવા ત્રણ ત્રણ પ્રોડ્યુસર્સ મળ્યા એટલે ફિલ્મનું ઓરીજીનલ બજેટ ૮ કરોડ હતું એ ૨૦ કરોડ કરવામાં આવ્યું. પોન્ટી ચઢ્ઢા આ ફિલ્મને ૨૫૦૦ સ્ક્રીનમાં રીલીઝ કરવાના હતા એટલે એમને ખાતરી હતી કે પ્રોડ્યુસર્સના રૂપિયા નહીં ડૂબે. આમ તો પ્રોડ્યુસર્સ પહેલા વર્ષથી જ તૈયાર હતા માટે જાણવા મળતી વિગત મુજબ અજય દેવગણને પણ મુખ્ય પાત્ર માટે એપ્રોચ કરવામાં આવ્યો હતો. અજય પાસે પણ સમયનો અભાવ હતો એટલે વાત ન બની. આ પછી અભિષેક બચ્ચનને પણ આ ફિલ્મ માટે એપ્રોચ કરવામાં આવ્યો પણ કોઈક કારણસર વાત ન બની. અક્ષય કુમાર એણે આપેલા પ્રોમીસ પર હજુ ઊભો જ હતો માટે અક્ષયની રાહ જોવામાં આવી અને આખરે ફેબ્રુઆરી ૬, ૨૦૧૨માં ફિલ્મની શરૂઆત કરવામાં આવી. 

        ફિલ્મની મૂળ વાર્તામાં હીરોઇન હતી જ નહીં પણ પાછળથી થયેલા ફેરફાર મુજબ હીરોઇન ઉમેરવામાં આવી. ભારતીય દર્શકોને ધ્યાનમાં રાખીને જ્યારે ફિલ્મ બનાવવી હોય તો હીરોઇન પર ગીતો ફિલ્માવવા જ પડે! હીરોઇન વગરનું કંઈ ફિલ્મ હોતું હશે? આવો પ્રશ્ન આવે જ. ફિલ્મની હીરોઇન માટે ખાસ લાંબી શોધ નથી ચાલી. કાજલ અગ્રવાલને સીધુ જ સિલેક્શન મળી ગયુ હતું. તમને એક હિન્દી ફ્લોપ ફિલ્મ ’ક્યોં હો ગયા ના?’ યાદ નહીં જ હોય. આ ફિલ્મ કાજલની પહેલી ફિલ્મ હતી. આ ફિલ્મ પછી કાજલે ઘણી બધી તામીલ અને તેલુગુ ફિલ્મ્સ કરી. સાઉથની ફિલ્મ્સમાં એ ખાસ્સી જાણીતી પણ બની. કાજલના હોઠ પર ફિલ્માવવામાં આવેલા તામીલ ગીત પર ચર્ચાઓ થઈ હતી. ફિલ્મ જોઇશો તો તરત જ સમજી જશો કે આ ફિલ્મમાં કાજલ અગ્રવાલ ન હોત તો પણ ફિલ્મમાં કોઈ ફેર ન પડત. માત્ર ફિલર તરીકે કાજલને ફિલ્મમાં સમાવવામાં આવી છે. અહીં એક વાત નોંધી લઈએ કે કાજલના પગલે કાજલની બહેન નિશા પણ તામીલ અને તેલુગુ ફિલ્મમાં હીરોઇન છે. નીરજ સાથે સફળતાનો સ્વાદ ચાખી ચૂકેલા અનુપમ ખૈર તો આ ફિલ્મ માટે ખાસ્સા એક્સાઇટેડ હતા જ. અનુપમ ખૈરની અદાકારી માટે તો કંઈ કહેવું જ ન પડે. અનુપમ ખૈરનો વર્ષોના અનુભવ ને લીધે લાજવાબ રીતે પાત્રની સમજ બહુ ઓછા કલાકારો પાસે હોય છે એટલે જ ફિલ્મ ખાસ હોય કે ન હોય અનુપમ ખૈરને તો જોવા ગમે જ. જીમ્મી શેરગીલને હું ખૂબ સારો કલાકાર માનુ છું અને મને ખાસ ગમ્યો હોય તો ’શાહબ, બીવી ઔર ગૅંગ્સ્ટર’થી. જીમ્મી પણ આ ફિલ્મમાં પોતાનું પાત્ર ખૂબ સરસ ભજવી ગયો છે. દિવ્યા દત્તા નાના પાત્રમાં પણ પોતાનું અસ્તિત્વ દેખાડી જ શકે. મનોજ બાજપેયી ફિલ્મમાં સીબીઆઇ ઇન્સ્પેક્ટરની ભૂમિકામાં છે. મનોજ દેખીતી રીતે શરીરથી દૂબળો લાગે છે પણ અભિનય માટે તો મનોજના પણ વખાણ કરવા જ  પડે. ફિલ્મની વાત આવે તો દરેક પાત્ર યોગ્ય રીતે કામ કરે છે પણ થોડો કથાનો અને થોડો ડિરેક્શનનો ખાંચો નરી આંખે દેખાય આવે છે.

        ફિલ્મના સારા પાસાની વાત કરીએ તો આખી વાતને ૮૦ થી ૯૦ના દાયકામાં લઈ જવી એ સૌથી અઘરી વાત છે. જ્યારે વાતને ટાઇમ ટ્રાવેલ કરાવો ત્યારે પાત્રને જ્યાં જ્યાં ફેરવો ત્યાં ત્યાં  એ સમયની કાર, સ્કૂટર, બોર્ડ બધી જ બાબતો હોવી જોઈએ. આ માટે પ્રોડક્શનનો ખર્ચ ખૂબ મોટો થાય છે પણ ફિલ્મ ગોર્જીયસ બને. એકાદ જગ્યાને બાદ કરતા સમયનો ખાંચો ક્યાંય વર્તાતો નથી. બીજી વખાણવા લાયક વાત એ છે કે દરેક પાત્રો ખૂબ સારી એક્ટીંગ કરવામાં સફળ થયા છે. એમ છતા પણ ફિલ્મ કેમ એવરેજ એવો તમને સવાલ થતો હોય તો થોડા વિસ્તારથી ચર્ચા કરી લઈએ. ફિલ્મની મુખ્ય કથા ત્રીભોવન વેલજી જ્વેલર્સમાં નકલી સીબીઆઇ દ્વાર થયેલી લૂંટની સત્ય ઘટના છે. ફિલ્મના પાત્રોને એસ્ટાબ્લીસ કરવા ફિલ્મમાં નકલી સીબીઆઇ દ્વારા એક રેડ બતાવવામાં આવે છે. પાત્રોની સ્ટાઇલ અને સ્કીમ બતાવવા માટે એક નકલી રેડ ઘણી થઈ જાય છે પણ અડધા કલાકના ફિલર માટે બીજી આવીને આવી ઇન્કમ ટેક્ષ રેડ બતાવવામાં આવે છે. ફિલ્મ માંથી આ બીજી રેડ કાઢી નાખો તો ફિલ્મની કથામાં કોઈ જ ફેર નથી પડતો કે ફિલ્મ માટે કોઈ જ રીતે એ મહત્વની ઘટના નથી. આ રીતે જ ફિલ્મમાં અગાઉ કહ્યું એમ હીરોઇનની જરૂર હોય માટે જ એક છોકરી ખાસ રીતે ઉમેરવામાં આવી છે. અક્ષય-કાજલની લવ સ્ટોરીનું કોઈ જ મહત્વ નથી. આ લવ સ્ટોરી પણ એક બે ગીત અને એક બે પ્રસંગો માટે આવે છે જેને પણ ફિલ્મની મૂળ વાર્તા સાથે ધરાર જોડવાની કોશિશ કરી છે. હાં ફિલ્મના અંતમાં ખુલતુ સસ્પેન્સ સામાન્ય દર્શકોને ઇમ્પ્રેસ કરવા માટે પૂરતું છે. મારી વાત કરુ તો મારા માટે વાત પ્રીડીક્ટીબલ હતી, હવે તમે જ જોઈને નક્કી કરો કે તમારા માટે આ સસ્પેન્સ કેટલું અઘરું હતું.

        ફિલ્મમાં મ્યુઝિકની ક્રેડિટ એમ.એમ. કીરવાનીને જ આપવામાં આવી છે પણ જ્યાં સુધી હું જાણુ છું ત્યાં સુધી હ્રિમેશ રેશમીયા અને ચંદન શર્માએ પણ ફિલ્મમાં મ્યુઝિક આપ્યું છે. મ્યુઝિકમાં તો કંઈ ખાસ કાઢી લેવા જેવું નથી પણ ફિલ્મ જોવી હોય તો એકાદ બે ગીતો તો સહન કરવા જ પડે. ફિલ્મને મુખ્યત્વે દિલ્હીમાં શૂટ કરવામાં આવ્યું છે. ફિલ્મનો બેઝ દિલ્હી, કલકત્તા અને મુંબઈ છે પણ મોટાભાગની ફિલ્મ દિલ્હીમાં જ શૂટ થઈ છે. આમ તો ફિલ્મ રીલીઝની તારીખ ૨૦ ડિસેમ્બર નક્કી થઈ હતી પણ પ્રોમોશન માટે કલાકારો પાસે સમય ન હોવાથી અને બીજી ફિલ્મ્સની રીલીઝને ધ્યાનમાં રાખીને ફેબ્રુઆરી ૮ના રોજ રીલીઝ કરવાનું નક્કી કરવામાં આવ્યું. સીબીઆઇ માટે ૬ ફેબ્રુઆરીના રોજ ખાસ શો યોજવામાં આવ્યો હતો. આ ઉપરાંત કલાકારોના સમુહે ઓપેરા હાઉસ ત્રીભોવન વેલજી જ્વેલર્સની માર્ચ કરીને ફિલ્મ પ્રોમોટ કરી હતી. લગભગ બધાંએ ફિલ્મ વખાણી છે તો પણ હું ફિલ્મને મસ્ટ વોચ લિસ્ટમાં ન મૂકતા ૩ સ્ટાર આપુ છું.

પેકઅપ:

"तमसो मां ज्योतिर्गमय" નો અર્થ શું થાય?"

"તું સૂઈ જા માં, હું જ્યોતિના ઘેર જઈને આવું"

વિશ્વરૂપ: ભારતમાં પણ વિશ્વ કક્ષાની ફિલ્મ બની શકે!

          "જુઓ એક તો આ ફિલ્મ છે અને ફિલ્મના બે જ પ્રકાર હોય છે, સારુ ફિલ્મ અને ખરાબ ફિલ્મ. ફિલ્મ હીટ છે કે ફ્લોપ એ નક્કી કરનારો વર્ગ એ જ છે જે ફિલ્મની ટીકીટ ખરીદે છે. હું આશા રાખુ છું કે કમલ હસનના બધા જ ફેન એમને સપોર્ટ કરશે જેમ હું ફુલ્લી સપોર્ટ કરી રહ્યો છું. ભૂલી ગયા ’એક દુજે કે લીયે’? હું કમલ હસનને સપોર્ટ કરુ છું. સિનેમા હોલની બહાર ઊભા રહો અને લોકોને ફિલ્મ જોવાનું કહો. આ ફિલ્મ છે મિત્રો, મનોરંજન, લો એન્ડ ઑર્ડરને આનાથી શું વાંધો હોઈ શકે? જાઓ અને કહો કે તમારે આ ફિલ્મ જોવું છે. સુપ્રીમ કોર્ટનું જજમેન્ટ કહે છે કે સેન્સર થયા પછી ફિલ્મને કોઈ રોકી ન શકે. એક તો ફિલ્મ ઇન્ડસ્ટ્રીને કોઈ પણ તરફથી સપોર્ટ નથી મળતો સિવાય કે ફેન્સ. બસ ટેક્સ પર ટેક્સ અને હવે ફિલ્મને રીલીઝ થતી અટકાવવી...વાહ!!" સલમાન ખાનની આ બળતરા ખોટી નથી. ફિલ્મ એ મનોરંજન છે જેને મનોરંજન તરીકે જ જોવું જોઈએ પણ ભારતીય પબ્લીકની આ ધાર્મિક લાગણી એવી છે કે જે ગમે ત્યારે દુભાય શકે છે! કેટલી સસ્તી માનસિકતા પર લોકો આવી ગયા છે કે ફિલ્મને ફિલ્મ તરીકે જોવાને બદલે ધાર્મિક રીતે જોવાય છે! તમે જો ફિલ્મના શોખીન હો તો એક વાર થિયેટર પર જઈને ફિલ્મ જોઈ આવજો. મારી જેમ તમને પણ આશ્ચર્ય થશે કે ભારતમાં પણ વિશ્વ કક્ષાની ફિલ્મ બની શકે!

        ફિલ્મની વાત કરતા પહેલા આપણે થોડી ફિલ્મને લગતી કોન્ટ્રાવર્સીની ખણખોદ કરીએ. ફિલ્મ માટે કમલ હસને ખૂબ મહેનત કરી હતી અને પહેલો વિવાદ એ થયો કે કમલ હસન ફિલ્મને ડી.ટી.એચ. પર પ્રથમ રીલીઝ કરવા માગતા હતા કેમ કે ડી.ટી.એચ. તરફથી એક માતબર રકમ આ ફિલ્મને ઑફર કરવામાં આવી હતી. આ સાથે જ ડીસ્ટ્રીબ્યુટર્સ અને અન્ય લાગતા વળગતા લોકોને તકલીફ શરૂ થઈ. જો કે આ વાત પર મારા અંગત અભિપ્રાય મુજબ કમલ હસન ખોટા હતા. કમલે પોતાની આ ડિમાન્ડ પડતી મૂકી અને પ્રથમ થિયેટરમાં જ ફિલ્મ રીલીઝ કરવામાં આવશે એવું સ્વીકાર્યું. આ પછી બીજી કોન્ટ્રાવર્સી એવી ઊભી થઈ કે ફિલ્મના ટેલિવિઝન રાઇટ્સ કોને આપવા. એક તરફ તામિલનાડુના સી.એમ. જયલલિતાની જયા ટીવી અને બીજી તરફ વિજયા ટીવી. જ્યાં લાભ વધારે થતો હોય ત્યાં જ રાઇટ્સ આપવામાં આવે આથી ’વિશ્વરૂપ’ કે જેનું તામીલ નામ ’વિશ્વરૂપમ’ છે એના ટી.વી. રાઇટ્સ વિજયા ટીવીને આપવામાં આવ્યા. જયલલિતા તો બરાબર ધ્યાનમાં રાખે એવી સ્ત્રી. એ સાથે હમણાં જ એક જાહેર કાર્યક્રમમાં ચિદમ્બરમ અને જયલલિતા એક સ્ટેજ પર હતા ત્યારે કમલ હસને ચિદમ્બરમના ભરપેટ વખાણ કર્યા હતા. એક તો ધંધામાં નુકશાની અને ઉપરથી ચિદમ્બરમના વખાણ? પોલીટીક્સના ભાગરૂપે મુસ્લિમ સંગઠનોને એકઠા કરવામાં આવ્યા અને ફિલ્મને રીલીઝ થતી રોકી દેવામાં આવી. જયલલિતાએ પોતાનો બચાવ કરતા કહ્યું કે ’કમલ હસન અને મુસ્લિમ સંગઠન વાત કરી લે. મુસ્લિમ સંગઠનને જો વાંધો ન હોય તો મને ફિલ્મ રીલીઝ કરવા દેવામાં કોઈ જ વાંધો નથી. મારા માટે તો ૫૨૪ થિયેટરની સુરક્ષા સંભાળવી મુશ્કેલ હતી અને લો એન્ડ ઑર્ડર મેઇન્ટેઇન ન થાય તો રાજ્યના સી.એમ. તરીકે એ મારી જવાબદારી ગણાય’. મને લાગે છે કે આ ફિલ્મ કોઈ મુસ્લિમ સંગઠનોએ જોઈ નહીં હોય નહિતર આ ફિલ્મ માટે વિરોધ કરવાને બદલે આ સંગઠનો જ ફિલ્મ રીલીઝ માટે લડતા હોત. કમલ હસને પણ કહ્યું જ કે ’આ ફિલ્મ મુસ્લિમ વિરોધી નહીં પણ મુસ્લિમ તરફી છે’. ફિલ્મ જોઈને મુસ્લિમોને વાંધો લાગતો હોય તો હું કહીશ કે એ તમામ મુસ્લિમોને તાલીબાન મોકલી દેવા જોઈએ કેમ કે ફિલ્મમાં આંતકવાદની વાત છે નહીં કે મુસ્લીમની. ફિલ્મનો હીરો મુસ્લિમ છે અને ભારતની ’રો’ એજન્સી માટે કામ કરે છે. આંતકવાદનો સામનો કરે છે. જો કોઈ પણ વ્યક્તિ આંતકવાદને કોઈ પણ રીતે સપોર્ટ કરે છે તો એ હિન્દુ હોય કે મુસ્લિમ આતંકવાદી જ છે.

        એક ઉત્તમ ફિલ્મ બનાવવા માટે કેટલી મહેનત પડે છે એ જોવા પણ આ ફિલ્મ જોવું જોઈએ. અત્યાર સુધી આપણે હોલીવુડની ફિલ્મમાં જ સ્ટંટ દ્ગશ્યો, વિઝ્યુઅલ સ્પેશીયલ ઇફેક્ટ્સ, એનીમેશન વગેરે જોતા આવ્યા છીએ પણ આ ફિલ્મ જોઈને તમે એક એક ક્ષણે કહેશો કે કોઈ પણ સ્પેશીયલ ઇફેક્ટ કોઈ પણ રીતે હોલીવુડની ફિલ્મ્સથી ઊતરતી કક્ષાની નથી. એક એક દ્ર્શ્ય, એક એક ફાઇટ્સમાં જે રીતે ઇફેક્ટ્સ ગોઠવવામાં આવી છે તમે આહ! અને વાહ! શબ્દો બોલતા થાકી જશો. કોઈનું ધડ કપાય છે તો કોઈ પણ રીતે તમને એમ નહીં લાગે કે આ કપાયેલુ ધડ એનીમેટેડ છે. એક એક ફાઈટ સાથે ફાઈટ પછીના મેઇકઅપના વખાણ માટે પણ મારી પાસે શબ્દો ખૂટે છે. ભારતીય ફિલ્મ ઇન્ડસ્ટ્રી કમલ હસન કંઈક નવું આપે છે એ વાતથી ટેવાયેલી છે. કમલ હસનના ફેન્સ એટલાં બધા છે કે જેનો આંક માંડવો પણ મુશ્કેલ છે. મને કમલ હસનના બહુ ઓછા સર્જન ગમ્યા છે પણ ’વિશ્વરૂપ’ માટે તો કહીશ કે કમલ હસનનું શ્રેષ્ઠ સર્જન છે. કમલ હસન સાચે જ કમાલ કરી શક્યા છે. એ સાથે બૅકગ્રાઉન્ડ સ્કોર પણ અતિ સરસ કહી શકાય એવો છે. શંકર ઇસાન લોયને એમના મ્યુઝિક માટે સલામ કરવી જ રહી.

        આ ફિલ્મના સર્જન માટે ઓછા ચણા ચાવવામાં નથી આવ્યા. ફિલ્મની વાર્તા કમલ હસને પોતે જ લખેલી. આ ફિલ્મનું કાસ્ટિંગ બહુ પહેલાથી શરૂ કરવામાં આવ્યું હતું. ફિલ્મ માટે હીરોઇન તરીકે પ્રથમ પસંદગી હતી સોનાક્ષી સિંહા. સોનાક્ષીએ આ ફિલ્મ માટે ૨ કરોડ રૂપિયા માગ્યા હતા અને એ સ્વીકારવામાં પણ આવ્યા હતા. સારી ફિલ્મ બનાવવી હોય તો ઘણી બધી બાબતોનું ધ્યાન રાખવું પડે એટલે ડેઇટ્સ પાછળ જવા લાગી. સોનાક્ષી માટે આ એક પ્રૉબ્લેમ હતો એટલે આખરે અન્ય ફિલ્મ્સની ડેઇટ્સને લીધે સોનાક્ષી આ ફિલ્મ માંથી હટી ગઈ. આ પછી દીપીકા પાદુકોણ, કેટરીના કૈફ અને સોનમ કપૂર સાથે ઘણા સમય સુધી ચર્ચાઓ ચાલી. મીડિયાએ પણ આ ત્રણેય અભિનેત્રીઓને અલગ અલગ સમયે હીરોઇન ડીક્લેર કરી જ દીધી હતી પણ ફરી હિન્દી ફિલ્મ ઇન્ડસ્ટ્રીની ડેઇટ્સ અને આ ફિલ્મનું ડીલે થવું કારણ બન્યું. સાંભળવામાં આવ્યું છે કે વિદ્યા બાલનને પણ ફિલ્મ માટે એપ્રોચ કરવામાં આવ્યો હતો પણ વિદ્યાએ તો સીધી જ ના પાડી હતી. છેલ્લે સમીરા રેડ્ડી લગભગ નક્કી જ હતી પણ ઓડીશન દરમિયાન કમલ હસને ’સ્કાઇપ’ પર પૂજા કુમારને જોઈ. કમલ હસને પોતાની હીરોઇન તરીકે પૂજાને ફાઇનલ કરી અને સાબિત કરી આપ્યું કે સાચે જ એનું સિલેક્શન પણ એટલું જ મજબૂત છે જેટલું આ ફિલ્મનું ડિરેક્શન. ફિલ્મમાં કમલ હસન સાથે એક સપોર્ટીંગ એક્ટ્રેસ છે. આ એક્ટ્રેસ માટે પણ કમલ હસને ખાસ્સી મહેનત કરવી પડી હતી. આ રોલ માટે પણ શ્રીયા સરન અને પ્રિયા આનંદના નામો ચર્ચામાં રહ્યા પણ જ્યારે પહેલું શૂટીંગ સેસન શરૂ થયુ ત્યારે ઇશા સરવાણી આ રોલ માટે નક્કી થઈ. ઇશાએ એક સેડ્યુલ તો સાથે કામ કર્યું પણ કોઈક કારણોસર બીજા સેડ્યુલથી ઇશા પણ ફિલ્મ છોડી ચૂકી હતી. એન્ડર્યા જેર્મિયા છેલ્લે આ રોલ માટે નક્કી કરવામાં આવી. એન્ડર્યા તામીલ અને તેલુગુ ફિલ્મની સારી સિંગર છે. ફિલ્મના અંત સુધી સાથે રહેતી આ છોકરી પણ કમાલ એક્ટીંગ કરી ગઈ છે. ’ગેંગ્સ ઑફ વસ્સેપુર’ વખતે મેં લખેલુ કે જયદીપ આહલાવત એક અચ્છો કલાકાર છે. આ ફિલ્મમાં પણ જયદીપ પોતાનું પાત્ર અતિ સરસ રીતે નિભાવી શક્યો છે. રાહુલ બોઝ હટકે પાત્રો નિભાવવા માટે જાણીતો છે. અહીં તો એક હદથી વધારે સારુ કામ આપી શક્યો છે. કમલ હસનની અદાકારી માટે તો કંઈ કહેવું જ ન પડે પણ ફિલ્મમાં સ્ત્રેણ લાગતો કમલ હસન જોવો એ એક લહાવો છે. કત્થક માટે બિરજૂ મહારાજ પાસેથી કમલે ખાસ ટ્રેનિંગ લીધી હતી. ફિલ્મમાં કમલનો આ દેખાવ એકદમ બિરજૂ મહારાજ જેવો જ લાગે છે. ફિલ્મનો બેઝ અમેરિકા છે માટે પહેલા ફિલ્મનું શૂટીંગ અમેરિકા જ કરવાનું નક્કી કર્યું હતું પણ વિઝાના પ્રોબ્લેમને હિસાબે ફિલ્મ કેનેડામાં શૂટ કરવામાં આવી. મહામહેનતે અમુક દ્ગશ્યો કમલ હસન પોતે જઈને અમેરિકા ચોક્કસ ફિલ્માવી આવ્યા છે પણ જો કદાચ ત્યાં ન કર્યું હોત તો પણ ફિલ્મની કંટેઇન એટલી મજબૂત છે કે ચાલી જાત.

        ૯૫ કરોડના અધધ ખર્ચે ફિલ્મ બની હોય અને જો રીલીઝમાં આવો ખોટા રોડા નાખવામાં આવતા હોય તો કમલ હસન દેશ છોડવાની વાત કરે તો એમાં નવાઈ પામવા જેવું નથી. મારા વાચક મિત્રો અને ફિલ્મના ફેન્સ આપ બધાને સમાપન પહેલા એટલું કહીશ કે ફિલ્મ ખરેખર સારુ છે એટલે ચૂકતા નહીં. આ ઉપરાંત ફિલ્મને ફિલ્મ જ રહેવા દો, ફિલ્મ એ એક મનોરંજન છે. ફિલ્મને તમારી સાવ ખોટી કહેવાય એવી ધાર્મિક લાગણીઓ સાથે જોડવાનું પાપ ન કરતા. આ ફિલ્મને હું પૂરા ૪.૫ સ્ટાર આપુ છું. અડધો સ્ટાર એટલાં માટે કપાય છે કે બીજા ભાગની તૈયારી માટે એફ.બી.આઇ. ને ખબર થઈ ગઈ હોવા છતા રાહુલ બોઝ પ્રાઇવેટ પ્લેનમાં નીકળી જાય છે જે ક્યારેય શક્ય જ નથી.

પેકઅપ:

"હું મારા વજન કરતા હાઇટથી વધારે ચિંતિત છું"

"કેમ?"

"મારા વજન પ્રમાણે મારી હાઇટ ૭.૫ ફૂટ હોવી જોઈએ"