ઘનચક્કર: ચક્કર ચાલે એવું નથી

        માણસ જીવનમાં સૌથી વધુ કંઈ પણ ઇચ્છતો હોય તો પોતાની ખુશી. કોઈ પણ વ્યક્તિનો પોતાનો પ્રયત્ન એક જ હોય છે કે મને આનંદ ક્યાંથી મળે? કોઈને ભક્તિમાં આનંદ મળે, કોઈને વાંચનમાં આનંદ મળે, કોઈને ફિલ્મ જોઈને આનંદ મળે તો કોઈને અઢળક રૂપિયા ભેગા કરવામાં આનંદ મળે. આ કારણોથી જ લોકોને હર હંમેશા ફિલ્મ ગમતી આવી છે. ફિલ્મ લોકોને લાગણીમાં તાણી જાય છે, ફિલ્મ લોકોને રડાવે છે, ફિલ્મ લોકોને હિંમત આપે છે, ફિલ્મ લોકોને સત્ય બતાવે છે પણ લોકોને ગમતો વિષય રહ્યો છે હાસ્ય. જો તમે મન મૂકીને ફિલ્મ જોતા હસી શકો તો પૈસા વસૂલ. આ કારણોથી જ ફિલ્મ ઍક્શન હોય, હોરર હોય કે કોઈ પણ પ્રકારની હોય પણ ફિલ્મમાં કૉમેડી તો હોવી જ જોઈએ એવો ટ્રેન્ડ શરૂ થયો. આવા કારણોથી જ રાજકુમાર ગુપ્તાએ ’ઘનચક્કર’ બનાવ્યું. રાજકુમાર ગુપ્તાએ કહ્યું કે " અમે ’આમીર’માં લોકોને રડાવ્યા, ’નો વન કીલ્લ્ડ જેસીકા’માં લોકોને ઉત્સુક બનાવ્યા અને હવે ’ઘનચક્કર’માં લોકોને હસાવવાનાં છીએ" પણ ખરેખર તો આ ફિલ્મમાં એમણે રડાવ્યા એટલે લાગે છે કે ’ઘનચક્કર’નું ચક્કર ચાલે એવું નથી!

        રાજકુમાર ગુપ્તા ફિલ્મ ઇન્ડસ્ટ્રી સાથે ઘણા સમયથી જોડાયેલા છે. લોકોને યાદ હોય તો ’નો સ્મોકીંગ’ અને ’બ્લેક ફ્રાયડે’ એટલે કે અનુરાગ કશ્યપની બંને હટકે ફિલ્મમાં એસોસીયેટેડ ડિરેક્ટર હતા. અનુરાગ કશ્યપ હટકે ડિરેક્ટર છે અને એમની નીચે તૈયાર થયેલા માણસ માટે શું શંકા હોય શકે? રાજકુમાર ગુપ્તાની પહેલી ફિલ્મ હતી ’આમીર’ આ ફિલ્મથી જ લોકો રાજકુમારને એક સારા દિગ્દર્શક માનવા લાગ્યા હતા. આ પછીની એમની ફિલ્મ ’નો વન કિલ્લ્ડ જેસીકા’ પણ બૉક્સ ઓફીસ પર હીટ રહી. રાજકુમાર ગુપ્તા પોતે સારા લેખક પણ છે. એમની બંને ફિલ્મ એમણે લખી હતી અને આ ફિલ્મ પણ એમણે લખી છે. વાતનો બેઝ મજબૂત છે પણ વાત પકડ વગરની છે એટલે રાજકુમારના ડિરેક્શનનો પણ કમાલ ન જોવા મળ્યો.

        ફિલ્મમાં પાત્રો બહુ જ ઓછા છે અને લોકેશન પણ ઓછા છે એટલે ફિલ્મ ઓછા ખર્ચે બની હશે. અત્યારની ફૉર્મ્યુલા મુજબ એક વીક ફિલ્મ ચાલી જાય તો ધંધો તો થઈ જ જાય એવી આશાથી જ યુટીવી મોશન પીક્ચર્સે ફિલ્મ બનાવવા ઝંપલાવ્યું. સિદ્ધાર્થ રોય કપૂર અને રોની સ્કૃવાલાએ ફિલ્મ પ્રોડ્યુસ કર્યું છે. હવે જ્યારે સિદ્ધાર્થ હોય ત્યારે વિદ્યા બાલન કપૂર તો સ્કીમમાં આવે જ. વિદ્યા બાલન અત્યારે સાવ ફ્રી છે. ’ડર્ટી પિક્ચર’ પછી વિદ્યાએ વધારેલુ શરીર હવે યુટીવીની આવકની જેમ જ વધતું જાય છે. ઇમરાન અને વિદ્યાની જોડીને જુઓ તો લાગે કે મા-દીકરાની જોડી છે. વિદ્યા એક્ટીંગ તો સારુ કરી જ શકે પણ હવે શરીર પણ સાચવે તો ફરી ફિલ્મ કરશે નહિતર જેવી સિધ્ધાર્થની દયા! ફિલ્મ બનતી હતી ત્યારે ફિલ્મનું એક ગીત વરસાદમાં શૂટ કરવાનું નક્કી થયું હતું પણ ઇમરાન હાઝમી ’રાઝ 3’ના પ્રમોશનમાં બીઝી હતો એટલે એ શક્ય ન બન્યું. રાજકુમાર ગુપ્તાએ પોતાનું સ્ટેટમેન્ટ પણ કર્યું કે "અમારે ઓગસ્ટમાં આ ગીત શૂટ કરવું હતું, વિદ્યા હાલ કોઈ ફિલ્મ ન કરતી હોવાથી ફ્રી હતી પણ ઇમરાન પોતાની ફિલ્મના પ્રમોસનમાં બીઝી હતો એટલે શક્ય ન બન્યું" ઇમરાન હાઝમી ધીમી ગતીએ આગળ વધી રહ્યો છે. ભટ્ટ કૅમ્પ પછી બાલાજી ટેલી ફિલ્મનો હાથ પકડ્યો અને હવે યુટીવી મોશન પીક્ચર્સ સાથે પણ જોડાય ગયો છે. સિદ્ધાર્થ કપૂરે કહ્યું કે " ઇમરાન સૌથી વધુ ચાલતા કલાકારો માંનો એક છે અને આ ફિલ્મ માટેનું પર્ફેક્ટ કાસ્ટિંગ છે" ઇમરાને સારુ એક્ટીંગ કર્યું છે પણ સ્ક્રીપ્ટની થોડી નબળાઈ ઉપરાંત રીયલ કૉમેડીનો આર્ટિસ્ટ ન હોવાના કારણે થોડો નબળો પડ્યો છે જો કે ઇમરાનનું સ્ટેટમેન્ટ કંઈક આવું હતું કે "ઘનચક્કર હમણાંના સમયમાં સાંભળેલી બેસ્ટ સ્ક્રીપ્ટ છે. કોમર્સિયલ છે, હટકે છે અને ખૂબ એન્ટર્ટાઇનીંગ છે. હું ખાત્રી પૂર્વક માનુ છું કે આ ફિલ્મ મારી કેરિયરમાં લેન્ડમાર્ક સાબિત થશે"... કદાચ ઉંધી રીતે કે આવી ફિલ્મ ન કરવી...

        રાજેશ શર્માને હું લગભગ ૧૯૯૬થી જોતો આવું છું. મને રાજેશ શર્મા કાયમ માટે સારો કલાકાર લાગ્યો છે. રાજેશ શર્મા આ ફિલ્મમાં પંડિતના કૅરેક્ટરમાં છે. જો હું ભુલતો ન હોઉં તો ’માચીસ’ એમનું પહેલું ફિલ્મ હતું અને આ એમની ૩૭મી ફિલ્મ છે. રાજેશ શર્માની ફિલ્મી સફર મોટી છે પણ અહીં પંડીતજી ખાસ જામ્યા નથી. રાજેશ શર્મા સાથે ઇદ્રીસ નામના પાત્રમાં નીમીત દાસ છે. નીમીત દાસને મેં ’વેક અપ શીદ’માં અને ’લફંગે પરીંદે’માં જોયો હતો. મને ખાસ અસર છોડી શકે એવો છોકરો નહોતો લાગ્યો અને આ ફિલ્મમાં પણ એવું જ રહ્યું. કદાચ આ માટે ફિલ્મનો સ્ક્રીનપ્લે પણ કારણભૂત હોઈ શકે. આ ફિલ્મના સ્ક્રીનપ્લે પરવેઝ શેખ અને રાજકુમાર ગુપ્તાએ જ લખ્યા છે. 

        ફિલ્મનું મ્યુઝિક અમીત ત્રીવેદીએ આપ્યું છે. અમીત ત્રીવેદીના સંગીતનો હું આશિક રહ્યો છું પણ કોણ જાણે આ ફિલ્મમાં મને ખાસ મઝા ન પડી. આ ફિલ્મમાં ખૂબી એ છે કે ઓરીજીનલ રેકૉર્ડ થયેલા પાંચ ટ્રેકમાં બધા જ ગીતોમાં અમીત ત્રીવેદીનો પોતાનો અવાજ છે જ. અમીતે પોતાની બીજી દુકાન પણ ખોલવાની શરૂ કરી દીધી છે. કદાચ નવું સારુ સંગીત ન સૂઝે તો પછી ગીત ગાયને પણ ગુજરાન ચલાવી શકાય. 

        ફિલ્મની વાર્તા ખરેખર સરસ છે. ત્રણ વ્યક્તિ મળીને એક બેંક લૂટે છે અને ત્રણ મહીના પછી લૂટેલા ૩૦ કરોડનો ભાગ પાડવાનું નક્કી કરે છે. ત્રણ મહીને જ્યારે રૂપિયાની ઉઘરાણી થાય ત્યારે ઇમરાન પોતાની યાદ શક્તિ ગુમાવી ચૂક્યો હોય છે. આ રૂપિયા પાછાં લેવા માટેની જે રમત થાય છે અને એ દરમિયાન બનતા પ્રસંગોની ઘટના એટલે આ ફિલ્મ. ફિલ્મના અંતમાં ખૂબ સારી રીતે વાતને પલ્ટી મરાવવામાં આવી છે પણ તો પણ કોથળા માંથી બિલાડા જેવું લાગે છે. ખરેખર જો એક પર્ફેક્ટ ક્રાઇમ સ્ટોરી બની હોત તો ફિલ્મ વધુ સારી થઈ શકી હોત. ઓવર ઓલ ફિલ્મનું રેટીંગ આપવું હોય તો હું ૨.૫ સ્ટાર આપીશ. ટૂંકમાં ફિલ્મ જુઓ તો પણ ચાલે અને ન જુઓ તો પણ ચાલે...

પેકઅપ:

પાગલ ખાનાની નર્સ (એક પાગલને): " ચલ મારી સાડી, બ્લાઉઝ, ઇનરવેર બધું ઉતાર..... અને ખબરદાર જો હવે પછી ક્યારેય મારા કપડા પહેર્યાં છે તો....."

રાંઝણા: બુઠ્ઠું ધનુષ, વેવલી લાગણી

             એક અનુભવ લગભગ બધાને થયો હશે કે તમે રોડ પર નીકળો ત્યારે કો’ક દિવસ તમને કાંચીડા જ મરેલા દેખાય, કો’ક દિવસ કૂતરા જ મરેલા દેખાય, કો’ક દિવસ ખિસકોલી જ મરેલી દેખાય. આ જો જોગાનુજોગ ઘટના બનતી હોય તો પણ આવો અનુભવ થાય ચોક્કસ છે. આ રીતે જ ’આશિકી 2’ જેવી લવ સ્ટોરી સફળ થયા પછી હવે લવ સ્ટોરીઝની લાઈન થશે. જો કે આ ફિલ્મની શરૂઆત કે મંડાણ ૨૦૧૧માં જ થઈ ગયા હતા પણ જોગાનુજોગ એવા સમયે રીલીઝ થઈ જ્યારે લવ સ્ટોરીની સીઝન શરૂ થઈ છે. લવ સ્ટોરી માટે સૌથી મહત્વનું પાસું છે વાર્તા. પ્રેમ અદભૂત છે, પ્રેમ સંવેદના છે, પ્રેમ અનુભૂતિ છે પણ જો આ પ્રેમને યોગ્ય રીતે વાર્તામાં વણવામાં આવે તો નહિતર સડક છાપ પ્રેમ જોઈને પણ કંટાળો આવે. હાલની પરિસ્થિતિ અને જમાનાને અનુરૂપ જો પ્રેમની વાર્તા હોય તો જ ગળે ઊતરે નહિતર હાથ પર બ્લેડ મારતા કે અગરબતીથી હાથ પર પોતાની પ્રેમિકાનું નામ લખતા રોડ છાપ રોમિયો જેવી વાત બહાર આવે. ધ ગ્રેટ રજનીકાંતના જમાઈની પહેલી હિન્દી ફિલ્મ અને એ પણ લવ સ્ટોરી જોઈને લાગ્યું કે આ ધનુષ તો બુઠ્ઠું છે અને વાર્તામાં બતાવેલી લાગણીઓ વેવલી છે! 

        આ ફિલ્મના ડિરેક્ટર છે આનંદ એલ. રાઈ. આનંદ એલ. રાઈ માટે આ પ્રોજેક્ટ ખૂબ મહત્વનો હતો. આ ફિલ્મની સ્ક્રીપ્ટ હિંમાશુ શર્માએ ૨૦૧૧માં લખેલી ત્યારથી જ આ ફિલ્મ બનાવવા માટે તેઓ ઉત્સુક હતા. આનંદ રાઈ આ પહેલા ’તનુ વેડ્સ મનુ’ કરી ચૂક્યા છે. જો કે મને તો એ પણ નહોતી ગમી એટલે ઓછી આશા રાખીને જ ગયો હતો. આ ફિલ્મને એમણે તામિલમાં પણ ડબ કરી છે. તામિલ વર્ઝનનું નામ રાખવામાં આવ્યું છે ’અંબીકાપથી’. સાઉથની પ્રજા વ્યક્તિ પ્રેમી છે એટલે સાઉથના સુપર સ્ટાર અને ભગવાન એવા રજનીકાંતના જમાઈરાજનું ફિલ્મ હોવાથી સફળ બનાવે તો નવાઈ પામવા જેવું નથી!

        ફિલ્મની કથા બનારસથી શરૂ થઈ છે. જે બાળકને સરખી ચડ્ડી પહેરતા નથી આવડતું એ એક છોકરીના પ્રેમમાં પડે છે. આ પછીનો ગાળો છે સ્કૂલના સમયનો એટલે ધારી લઈએ કે ૧૭-૧૮ વર્ષની ઉમર હોય. આ ઉમરના ધનુષ અને સોનમ કપૂરને જોવા એટલે ગળે કળવો ઘૂંટડો ઉતારવા જેટલું કઠિન હતું તો પણ ઉતારી લીધો. આ ઉમરે એક હિન્દુ છોકરા અને મુસ્લિમ છોકરી વચ્ચે પ્રેમ થતા જ ઘરના લોકો સોનમને બહાર ભણવા માટે મોકલી દે છે. આ પછીનો ગાળો છે આઠ વર્ષનો. આ આઠ વર્ષ દરમિયાન આટલો અનુપમ પ્રેમ હોવા છતાં ધનુષ ક્યારેય સોનમ ક્યાં છે એની તપાસ કરતો નથી! અચાનક આઠ વર્ષ પછી પાછી આવતી સોનમ કોણ જાણે કેમ પણ ધનુષને ઓળખતી પણ નથી. આશ્ચર્ય કે પહેલા પ્રેમને સોનમ ભૂલી ગઈ! સોનમને એક આદર્શ પ્રેમીની જેમ ધનુષ મદદ કરવા તૈયાર હોય એ ડીફોલ્ટ પણે સ્વીકારવું રહ્યું. અચાનક જ સોનમ કહે કે એ અભય દેઓલને પ્રેમ કરે છે. ધનુષ ફરી આદર્શ પ્રેમીની જેમ જ સોનમને મદદ કરી લગ્ન ગોઠવે છે પણ અભયની હકીકતની એને જાણ થતા લગ્ન સમયે જ બધાની હાજરીમાં વાત ખોલી દે છે. સોનમના ઘરના લોકો અભયને ખૂબ મારે છે અને રેલવે ટ્રેક પર ફેંકી દે છે. ફરી બચાવે પણ ધનુષ જ છે. સોનમને એના પ્રેમને મેળવવા માટે ધનુષ પંજાબ લઈને જાય છે ત્યારે ખબર પડે છે કે અભય મરી ચૂક્યો છે. સોનમ દિલ્હી જઈ અભયનું પોલીટીકલ વિઝન સંભાળી લે છે. ધનુષ પણ પાછળ પાછળ દિલ્હી પહોંચે છે. અહીંથી આ ફિલ્મ લવ સ્ટોરી ન રહેતા પોલીટીકલ સ્ટોરી બની જાય છે. ધનુષ પાર્ટીનો લીડર બની જાય છે. આ આખા સફરમાં હદ બહારનો કંટાળો આવે છે. જૂની હિન્દી ફિલ્મ્સ યાદ આવી ગઈ કે જેમા હીરો વિલનની ગેંગ જોઈન કરે એટલે સીધી બોસ પછીની જ પોઝિશન હોય!

        ધનુષનું આગમન જોરદાર થયું હતું. ધનુષનું ખરું નામ વેંકટેશ પ્રભુ કસ્તુરી રાજા છે. ૨૦૧૧નું વર્ષ ધનુષ માટે ખૂબ મહત્વનું રહ્યું. ધનુષની તામિલ ફિલ્મ ’અદુકાલમ’ માટે નેશનલ ફિલ્મ એવૉર્ડ ફોર બેસ્ટ એક્ટીંગ મળ્યો. એ સાથે સાથે ધનુષનું ગીત ’કોલાવરી ડી’ સી.એન.એન. દ્વારા બેસ્ટ સોંગ ઑફ ઇયર ડિક્લેર થયું. ધનુષ મલ્ટી ટેલેન્ટેડ પર્સનાલિટી છે. પોતે ગીતો લખે છે, કંપોઝ કરે છે, ગાય પણ છે. તાજેતરમાં જ ધનુષે વુન્ડરબાર સ્ટુડિયોની પણ સ્થાપના કરી એટલે ટૂંક સમયમાં ફિલ્મ્સ પ્રોડ્યુસ કરવાનું પણ શરૂ કરશે. ધનુષ પાસે કોઈ જ હીરો વેલ્યૂ નથી, જો વેલ્યૂ હોય માત્ર રજનીકાંતના જમાઈની વેલ્યૂ છે જે અન્ય વેલ્યુઝ કરતા ઘણી વધારે છે. 

        અગાઉ વાત કરી એમ ફિલ્મના મંડાણ ૨૦૧૧માં થયા હતા ત્યારે શહીદ કપૂર અને સોનાક્ષી સિંહાની જોડી ડિક્લેર કરવામાં આવી હતી પણ ૨૦૧૨ સુધીમાં આ જોડી ધનુષ અને સોનમ કપૂરમાં ફરી ગઈ. આ રીતે જ ફિલ્મમાં ધનુષની બાળપણની ફ્રેન્ડનું પાત્ર અદિતિ રાવ હૈદરીને આપવામાં આવ્યું હતું પણ ફિલ્મ શરૂ થતા વાર લાગી એટલે અદિતિએ પોતાની ડેટ્સ બીજી ફિલ્મને આપી દીધી એટલે આ પાત્ર સ્વરા ભાસ્કરને આપવામાં આવ્યું. સ્વરાએ હમણાં થોડા સમય પહેલા જ સારી ફિલ્મ ’ઔરંગઝેબ’ કરી હતી. ફિલ્મમાં જો કોઈ સારી વાત હોય તો સ્વરાનું અને ધનુષના મિત્રનું પાત્ર ભજવતા મહમદ ઝીશાન અયુબનું એક્ટીંગ. મહમદે આ પહેલા કરેલી ફિલ્મ્સ ’નો વન કિલ્લ્ડ જેસીકા’, ’મેરે બ્રધર કી દુલ્હન’ અને ’જન્નત 2’માં પણ નોંધવા લાયક એક્ટીંગ કર્યું હતું. સોનમ કપૂરે સારી એક્ટીંગ કરવાનો પ્રયત્ન ચોક્કસ કર્યો છે પણ છતા ખાસ જામી નહીં. સોનમે એવું સ્ટેટમેન્ટ આપ્યું હતું કે એણે આ પાત્રની પ્રેરણા જયા બચ્ચનના ’ગુડ્ડી’ ફિલ્મના પાત્ર પરથી લીધી પણ જયા ઇનોસન્ટ લાગતી હતી જ્યારે સોનમ કોઈ પણ એંગલથી ફિલ્મમાં ઇનોસન્ટ લાગતી નથી. ધનુષે હિન્દી શીખવા માટે ખાસ વર્ગ ભર્યા તો પણ ધનુષના મોઢે હિન્દી ડાયલોગ્ઝ જામતા નથી. 

        રહેમાન સાહેબના મ્યુઝિક માટે લોકો તરસતા હોય છે. રહેમાનના એવા આશિકો મેં જોયા છે કે ફિલ્મ રહેમાન સાહેબને લીધે જોવા જાય. ફિલ્મની શરૂઆતના ટાઇટલમાં જ રહેમાન સાહેબનું નામ આપવામાં આવ્યું બાકી મહેનત કરવી પડત કે કોનું મ્યુઝિક હતું. રહેમાને મ્યુઝિક બનાવવામાં ઘણો લાંબો સમય લીધો તો પણ રહેમાન સાહેબ છે કંઈ ખરાબ બોલાય? ફિલ્મના ડિરેક્ટરે પ્રેસ કૉન્ફરન્સમાં કહ્યું કે "આ એક ક્રીએટીવ પ્રોસેસ છે અને મને એમાં આનંદ આવે છે. મોડું થવાનું કારણ રહેમાન સાહેબ નથી"

        ફિલ્મની સિનેમેટોગ્રાફી નટરાજન સુબ્રમનીયમ અને વિશાલ સિંહાને સોંપવામાં આવી હતી. મને નટરાજનની સિનેમેટોગ્રાફી ઘણા સમયથી ગમતી આવી છે. નટરાજનના જીવનનો સૌથી પહેલો અને જાણીતો પ્રોજેક્ટ હતો ’યુફોરિયા’ મ્યુઝિક આલબમ. આ પછી અનુરાગ કશ્યપની ખૂબ જાણીતી શૉર્ટ ફિલ્મ ’લાસ્ટ ટ્રેઇન ટુ મહાકાલી’ એમણે પહેલી ફિક્શન ફિલ્મ કરી હતી.  આમ તો એમણે ઘણી ફિલ્મ્સમાં સિનેમેટોગ્રાફી કરી છે પણ ’જબ વી મેટ’, ’હલ્લા બોલ’, ’લવ આજ કલ’ ની સિનેમેટોગ્રાફી મને ગમી હતી. આ ફિલ્મમાં પ્રયોગ વગર ચિલ્લાચાલુ શોટથી જ ચલાવી લેવામાં આવ્યું છે. હજુ એ જાણવા નથી મળ્યું કે ક્યો પાર્ટ નટરાજને અને ક્યો પાર્ટ વિશાલે શૂટ કર્યો છે.

        ફિલ્મનું બજેટ ૩૫ કરોડનું બજેટ થયું. પ્રોમોશન પણ પુરેપુરુ કરવામાં આવ્યું છે. આમ તો સાઉથમાં તામિલ વર્ઝન અને ભારતભારમાં હિન્દી વર્ઝન રીલીઝ થયું છે એટલે ખર્ચ તો કાઢી જ લેશે પણ જો તમે ખરેખર ફિલ્મ પ્રેમી હો તો ખર્ચ ન કરતા. સ્ટાર આપવાની વાત હોય તો ૨ સ્ટારથી વધારે નહીં આપી શકાય....

પેકઅપ:

"આવનારા ગ્રાહકનું નામ રજનીકાંત હશે તો પણ બપોરે ૨ થી ૪ દુકાન નહીં ખોલવામાં આવે"

- રાજકોટ દુકાનદાર એસોશિયેશન

ફુકરે: એક્ટીંગ, સ્ક્રીનપ્લે, સ્ટોરી અને સિનેમેટોગ્રાફીનો સુભગ સમન્વય

       સિનેમા પ્રેમીઓ માટે હર હંમેશા રસનો વિષય કૉમેડી રહ્યો છે. ગમે તે પ્રકારની ફિલ્મ્સ લોકો પસંદ કરે પણ આખરે તો હરીફરીને પોતાની જાતને હળવી કરવા કૉમેડી તરફ પાછાં વળ્યા જ છે. આ કારણોથી જ ફિલ્મ ગમે તેવી હોઈ તેમાં હળવા ડાયલૉગ, હળવા પ્રસંગો, હળવી પળો મૂકીને લોકોને આનંદિત કરવાનો પ્રયાસ સતત ચાલુ રાખવામાં આવ્યો છે. એક સમય હતો જ્યારે મહેમુદ ફિલ્મના હીરો કરતા વધારે રૂપિયા લેતા પણ સમય જતા અમિતાભના આવ્યા પછી કોમેડીયનની ગરજ પણ અમિતાભ બચ્ચને સારી એટલે ફિલ્મ બનાવવા વાળા શીખ્યા કે હીરો પાસે જ કૉમેડી કરાવી હોય તો પણ ફિલ્મ ચાલે. કૉમેડી માટે નાનાથી લઈને મોટા ડિરેક્ટર્સ સુધીના લોકોએ કૉમેડી ફિલ્મ કરવાનો પ્રયાસ કર્યો જ છે પણ જો ખૂબ ઓછા બજેટમાં, કોઈ નામી કલાકારો કે છાપેલા કાંઠલા વગર કૉમેડી ફિલ્મ કરવી એ હિંમતનું કામ છે. ’ફુકરે’ એટલે આવી જ કૉમેડી ફિલ્મ જેમાં તમે માણસો એક્ટીંગ, સ્ક્રીનપ્લે, સ્ટોરી અને સિનેમેટોગ્રાફીનો સુભગ સમન્વય.

        ફિલ્મનો આધાર એટલે ફિલ્મની વાર્તા પણ ઘણીવાર વાર્તા સારી હોય અને સ્ક્રીનપ્લે સારો ન હોય તો પણ ફિલ્મ ન ચાલે. આ રીતે જ સ્ક્રીનપ્લે પણ સારો હોય પણ ફિલ્મની સિનેમેટોગ્રાફી સારી ન હોય, એક્ટર્સ એક્ટીંગ સારી ન કરે તો પણ ફિલ્મનો હાર્દ મરી જાય. સૌથી ઉપર જો કોઈ બાબત હોય તો ફિલ્મનું ડિરેક્શન. ’ફુકરે’ મ્રીઘદીપ સિંઘ લાંબાએ ડિરેક્ટ કર્યું છે. આમ તો આ પહેલા ’તીન થે ભાઈ’ ડિરેક્ટ કરી ચૂક્યા છે પણ ખરા અર્થમાં એમનું ડિરેક્શન માણવા મળ્યું હોય તો આ ફિલ્મમાં. મ્રીઘદીપ સિંઘ સારા સ્ક્રીનપ્લે રાઇટર પણ છે. મ્રીઘદીપ સિંઘની લોકોને ખબર નહીં હોય પણ તેઓ સારા સિનેમેટોગ્રાફર પણ છે. એમણે ’કાશ’ ફિલ્મ માટે સિનેમેટોગ્રાફી કરી હતી. મ્રીઘદીપે વખાણવા લાયક ડિરેક્શન કર્યું છે.

        ફિલ્મની વાર્તા સાવ સાદી છે. એક મૂરખ મિત્ર ઉટપટાંગ સપના જુએ છે અને બીજો મિત્ર આ સપનાનો ઉટપટાંગ અર્થ કાઢી લોટરી રમે છે. દરેક વખતે જીતે પણ છે. આ લોકો સાથે બીજા બે મિત્રો જોડાય છે અને દરેકની તકલીફ દૂર કરવા એક મોટો દાવ રમે છે. આ પરિસ્થિતિ પછી એમની જે રીતે વાટ લાગે છે અને જે રીતે બહાર નીકળે છે એ માણવું એક લહાવો છે. પુલકીત શર્માનું આ પહેલું ફિલ્મ. આ પહેલા પુલકીત ’ક્યોંકી સાંસ ભી કભી બહુ થી’માં વિરાણી પરિવારનો સદસ્ય બતાવવામાં આવ્યો હતો. ’ઇન્ડિયન ટેલી એવૉર્ડ’માં બેસ્ટ ફ્રૅશ ન્યુ ફેસ એવૉર્ડ પણ જીત્યો. આમ તો પુલકીતની પહેલી ફિલ્મ ’બીટ્ટુ બોસ’ હતી પણ જામી નહીં. પુલકીતને પ્રથમ ગ્રાસે મક્ષીકા જેવું થયું હતું. પહેલી ફિલ્મ વખતે જ પીઠનો દુખાવો શરૂ થયો અને દુબઈ ટ્રીટમેન્ટ કરાવવી પડી. ફિલ્મમાં લાલીનું પાત્ર ભજવતો મનજોત સિંઘ માટે ફિલ્મની એન્ટ્રી સાવ વિચિત્ર રીતે થઈ. ’ઓયે લક્કી! લક્કી ઓયે!’ માટે ઓડીશન આપવા ગયો પણ કાસ્ટિંગ ડિરેક્ટરે રીજેક્ટ કરી દીધો. નસીબ સારા કે દિબાકર બેનર્જીએ ધરાર ફિલ્મ આપ્યું. આ પછી મનાલી વર્કશોપમાં એક અઠવાડિયું ગયો અને ખરા અર્થમાં એક્ટીંગ શીખ્યો. આ પછી ’ઉડાન’ અને ’સ્ટુડન્ટ ઑફ ધ ઇયર’ કરી. આ બંને ફિલ્મમાં મનજોત લોકોનું ધ્યાન ખેંચી શક્યો હતો. 

        અલી ફઝલ એટલે ફિલ્મનો ઝફર. અલીની કેરિયરની શરૂઆત પિઝા હટ, યુનિયન બેંક ઑફ ઇન્ડિયા, માઇક્રોમેક્સ મોબાઇલ વગેરે એડવર્ટાઇઝ કરી ચૂક્યો હતો. અલી સારો ડ્રામા આર્ટિસ્ટ પણ ખરો. એક ડ્રામા વખતે રાજકુમાર હીરાણીએ અલીને જોયો અને ’થ્રી ઇડિયટ્સ’માં જોય લોબોના પાત્ર માટે સાઇન કર્યો. આ પછી ’ઓલવેયઝ કભી કભી’ પણ કરી. અલીનો ખરેખર સારો કલાકાર છે. ફિલ્મમાં પુલકીત સામે પ્રિયા આનંદને લેવામાં આવી છે. પ્રિયાની કેરિયરની શરૂઆત પણ ટીવી કોમર્સિયલથી શરૂ થઈ હતી. પ્રિયાની ફિલ્મ કેરિયર તમીલ ફિલ્મથી શરૂ થઈ સાથેસાથે તેલુગુ ફિલ્મ્સ પણ એણે કરી પણ પહેલી હિન્દી ફિલ્મ ’ઇંગ્લિશ વિંગ્લીશ’ કરી. પ્રિયાની બીજી ફિલ્મ ’રંગરેઝ’ હતી. ફિલ્મમાં ભોલી પંજાબણ થતી રીચા ચઢ્ઢા માટે તો ક્યાં કંઈ કહેવું જ પડે? રીચા મૂળગત રીતે સ્ટેજની કલાકાર. રીચાએ ભારત ઉપરાંત પાકિસ્તાનમાં પણ ઘણા ડ્રામા કર્યા છે. રીચાની ફિલ્મ ઇન્ડસ્ટ્રીમાં એન્ટ્રી ’ઓયે લક્કી! લક્કી ઓય!’થી થઈ. આ પછીની એની ફિલ્મ હતી ’ગેંગ્સ ઑફ વસ્સેપુર ૧-૨’ આ ફિલ્મમાં એના એક્ટીંગ માટે પણ મેં ભરપૂર વખાણ કર્યા હતા અને ’ફુકરે’ માટે પણ કહું છું કે ખૂબ સારી અભિનેત્રી. ફિલ્મમાં અલી સામે ટીચરની ભૂમિકા વિશાખા સિંઘે કરી છે. વિશાખા આમ તો અબુધાબીથી છે પણ અભ્યાસ દિલ્હીમાં કર્યો છે. વિશાખાને આશુતોષ ગવરીકરે ’ખેલે હમ જી જાન સે’. આપી હતી જો કે વાંચવામાં આવ્યું છે ત્યાં સુધી કદાચ ’હમ સે હૈં જહાં’ વિશાખાની પહેલી ફિલ્મ હતી. વિશાખા ફિલ્મ પ્રોડ્યૂસર પણ છે. વિશાખાએ બે-ત્રણ તમીલ ફિલ્મ પ્રોડ્યુસ કરી છે. વિશાખા માટે આજનો દિવસ ખાસ છે કેમ કે આજે રજૂ થનારી ’અંકુર અરોરા મર્ડર કેસ’માં પણ એ છે. પંકજ ત્રીપાઠી ફિલ્મમાં પંડીતજીનું પાત્ર ભજવે છે. પંકજ ત્રીપાઠી હવે મંજાયેલો કલાકાર થઈ ગયો છે. કોઈ પણ પાત્ર આપો પંકજ ફીટ જ હોય. 

        ફિલ્મ માટે જો કોઈ પણના મોં ફાટ વખાણ થઈ શકે તો ફિલ્મમાં ડેબ્યુટ કરનાર વરૂણ શર્માના. વરૂણ ફિલ્મમાં ચીચોનું પાત્ર ભજવે છે. બુધ્ધી વગરના પાત્રો તમે ઘણી ફિલ્મમાં જોયા હશે પણ વરૂણે તો હદ વટાવી છે. આ પાત્રને ફિલ્મની બહાર નીકળીને પણ તમે જરૂર વખણાશો. રામ સંપથનું મ્યુઝિક પણ માણવા લાયક છે. ફિલ્મની સિનેમેટોગ્રાફી કે.યુ. મોહનનની છે. ફિલ્મના અમુક શોટ એટલાં અફલાતૂન બનાવ્યા છે કે મારા જેવા ફિલ્મ રસિક માટે આશ્ચર્યની વાત છે. ફિલ્મના એક દ્ગશ્યમાં પુલકીત અને વરૂણ એક છત પર સુતા છે જ્યાં કેમેરો ૩૬૦ ડીગ્રીએ ફરે છે. આ દ્ગશ્ય માટે ચલાવેલી કલ્પના રિસર્ચ માંગી લે એવી છે. આખુ દ્ગશ્ય મિરર રાખીને મિરર ઇમેજથી લેવામાં આવ્યું છે. આ રીતે જ વાઇડ એન્ગલ લેન્સથી અમુક ફિક્સ શોટ માણવાની મઝા જ પડે છે. 

        ફિલ્મ ફરહાન અખ્તર અને રીતેશ સીધવાનીએ પ્રોડ્યુસ કર્યું છે. રીતેશે ટ્વિટ કર્યું હતું કે " ’ફુકરે’  ’દિલ ચાહતા હૈં’, ’રોક ઓન’ અને ’જિંદગી ના મિલેગી દુબારા’ જેવો જ પ્રોજેક્ટ છે" આ વાત માન્ય ન રાખીએ તો પણ ફિલ્મ જોવા લાયક તો ચોક્કસ છે જ. સ્ટાર આપવાની વાત આવે તો ૩ સ્ટાર આપવા જ પડે. ૨ સ્ટાર જે કાપવા પડે છે એ માટેનું કારણ છે ફિલ્મની શરૂઆત. પાત્રોને એસ્ટાબ્લીસ કરવામાં ખાસ્સો સમય બગાડવામાં આવ્યો છે....

પેકઅપ:

"બે વ્યક્તિઓ ઝગડો કરતા હોય અને ટોળું ભેગું થાય અને તરત જ ત્યાં કોઈ ચાયનો ગલ્લો ખોલી લે તો સમજી લેજો કે તમે અમદાવાદમાં છો"

યમલા પગલા દિવાના-2: માથાના દુખાવાની ગોળી લઈને જવું

        એક સમય હતો જ્યારે ધર્મેન્દ્ર પ્રેમ કરતો જોવા મળતો, એક સમય આવ્યો જ્યારે ધર્મેન્દ્રને હી-મેન કહેવામાં આવ્યો અને માત્ર ગુંડાઓનો નાશ કરતો જોવા મળતો, એક સમય આવ્યો જ્યારે ચારિત્ર્ય અભિનેતા બનવાનો પણ પ્રયત્ન કર્યો અને અત્યારે એ સમય આવ્યો કે કૉમેડી કરવાની કોશિશ પણ કરી. આ રીતમાં ધર્મેન્દ્ર કરતા સની દેઓલમાં અલગ તરી આવ્યો છે. સનીએ કોઈ પણ કારણ વગર મારામારી જ કરી છે, હાં અમુક ફિલ્મ્સમાં પ્રેમ કર્યો છે પણ પ્રેમમાં પણ મારામારી જ કરી છે. બોબી માટે તો કંઈ કહી જ શકાય એમ નથી કેમ કે એક્ટીંગ શું કહેવાય એ સમજવા માટે કદાચ હજુ એક દશકો કાઢવો પડશે. એક માત્ર બોબી દેઓલ એવો આર્ટિસ્ટ છે જે સમયની સાથે શીખ્યો નથી બાકી અજય દેવગણ અને સૈફ અલી ખાન સમય સાથે પાક્યા છે. લોકોનું કહેવું છે કે આ ત્રણે બાપ દીકરામાં એક હોય તો પણ સહન કરવા અઘરા પડે જ્યારે અહીં તો ત્રણે ત્રણ સાથે છે એટલે માથાના દુખાવાની ગોળી તો સાથે રાખવી જ પડે!

        આમ જોઈએ તો ’યમલા પગલા દિવાના’ પણ ક્યાં જામ્યું હતું પણ કલેક્શન મળ્યું હતું એટલે બીજો ભાગ બનાવવાની ઇચ્છા રોકી ન શકાય. આ ફિલ્મથી ધર્મેન્દ્ર ફેમિલી એટલું બધું ખુશ થઈ ગયું કે વાય.એમ.ડી. જ પોતાના પ્રોડક્શન હાઉસનું નામ રાખી દીધું. આ પહેલા આ ત્રણે પિતા-પુત્રોએ મળીને ’અપને’ બનાવી પણ એટલી હદે મેલોડ્રામા કે લોકોએ આ ફિલ્મ જોવાનું ટાળ્યું. ફિલ્મનું પ્રોમોશન યશરાજ ફિલ્મ્સ દ્વારા કરવામાં આવ્યું છે. યશરાજનું પ્રોમોશન ખરેખર વખાણવા લાયક હોય છે એટલે જ ૫૦ લાખ હીટ યુ ટ્યૂબ પર મળી. ફિલ્મ એનાઉન્સ તો પહેલા ભાગના કલેક્શન પછી જ એનાઉન્સ થયું હતું. પહેલો ભાગ સમીર કાર્તિકે ડિરેક્ટ કર્યો હતો એટલે સૌથી પહેલા કાર્તિક જ ડિરેક્ટ કરશે એવું માનવામાં આવતું હતું પણ થોડા સમય પછી સામે આવ્યું કે રાહુલ રવૈલ આ ફિલ્મ ડિરેક્ટ કરશે પણ અંતે ડિરેક્શન આવ્યું સંગીથ શિવન પાસે. સંગીથ શિવન મલયાલમ ફિલ્મના ડિરેક્ટર તરીકે એસ્ટાબ્લીશ ડિરેક્ટર છે. એમની હિન્દી પહેલી ફિલ્મ હતી ’ઝોર’. આ ફિલ્મનો હીરો સની દેઓલ જ હતો. સની સાથે સંગીથ શિવનની ત્યારથી જ પાક્કી દોસ્તી એટલે આ ફિલ્મ આખરે એના હિસ્સે જ આવી. આ ઉપરાંત લગભગ ૫ ફિલ્મ્સ સંગીથ શિવને ડિરેક્ટ કરી છે પણ એક પણ ફિલ્મ એવી નથી આપી શક્યો કે જેના વખાણ થઈ શકે. ’ક્યા કુલ હૈં હમ’ જેવી ચીપ કૉમેડી પણ સંગીથે ડિરેક્ટ કરી હતી. ફિલ્મની વાર્તા લીન્ડા દેઓલ અને શુભાંગી રાઠોડે લખી છે. જો કે એ વાત અલગ છે કે લીન્ડા આમ તો જટ ફેમીલીમાં રહીને જટ જેવી જ થઈ ગઈ હોય એટલે કેવું લખાય એ ખબર ન પડે!

        ફિલ્મમાં ખાસ ખર્ચ ન થાય એ માટે સસ્તી હીરોઇન્સ પણ શોધવામાં આવી છે. સાંભળવામાં આવ્યું છે કે ફિલ્મની હીરોઇન નેહા શર્માને માત્ર ૨૦ લાખ જ આપવામાં આવ્યા છે. નેહાની કેરિયરની શરૂઆત ’ચીરુથા’ નામની તેલુગુ ફિલ્મથી થઈ હતી. નેહાની પહેલી હિન્દી ફિલ્મ હતી મોહિત સુરીના ડિરેક્શન વાળી ’કૄક’ જેમાં નેહા સામે સિરિયલ કીસર ઇમરાન હાઝમી હતો. ફિલ્મ ઠીક ઠીક સફળ ગઈ હતી. શહીદ કપૂર સાથે ’તેરી મેરી કહાની’ પણ કરી અને છેલ્લે ’ક્યા સુપર કુલ હૈં હમ’ કરીને કારકિર્દી પર પાણી ફેરવી દીધું. આ રીતે જ ક્રિષ્ટીના રીખવીની પણ આ પહેલી ફિલ્મ. ફિલ્મનું બૅકગ્રાઉન્ડ યુનાઇટેડ કીંગ્ડમ છે એટલે એ મુજબના ઉચ્ચારણ કરતી છોકરીની જરૂરિયાત હતી. યુ.કે.માં પણ લેસ્ટર શહેરમાં મોટાભાગનું શૂટીંગ કરવામાં આવ્યું છે. લેસ્ટર એટલે આમ જુઓ તો બીજુ ગુજરાત જ છે. લેસ્ટરમાં યુ.કે. રહેતા ભારતીયોની સંખ્યા સૌથી વધારે છે. ફિલ્મમાં સુચેતા ખન્નાને સાઇડ રોલમાં લેવામાં આવી છે. સુચેતા ’લાપતા ગંજ’ સિરિયલથી પ્રખ્યાત થયેલી. સુચેતા સાથે વિલન પાર્ટનરમાં જહોની લીવર છે. જહોની ભાઈની કૉમેડી હંમેશા કમાલ હોય છે પણ આ ફિલ્મમાં ઘણા ગેટઅપ બદલવા છતા ભાઈ હસાવી શક્યા નથી. આ રીતે જ ફિલ્મમાં અનુપમ ખૈરનો પણ પુરેપુરો દુરુપયોગ થયો છે. અનુપમ ખૈરના હિસ્સે ખૂબ થોડું કામ આવ્યું છે. એમણે પણ ખાસ મહેનત કરી નથી. અનુ કપૂર એક અદનો અભિનેતા છે. અનુ કપૂરને હિસ્સે સારો રોલ છે અને પ્રમાણમાં ઘણો ન્યાય આપવાની કોશિશ પણ કરી છે. 

        આ ફિલ્મમાં જટ ખાનદાનના એક વધુ જટ એટલે કે સની દેઓલનો છોકરો કરણ ઉર્ફે રોકી દેઓલ પણ સમાવવામાં આવ્યો. રોકીએ આ ફિલ્મમાં આસિસ્ટન્ટ ડિરેક્ટરશીપ કરી. બે દીકરા, બાપ, પત્ની બધા જ તો છે  અને આ ખાનદાન આમ પણ પોતાની જાતને સદાબહાર જ ગણે છે. હવે જો એકાદ છોકરો ડિરેક્શન પણ શીખી જાય તો ખર્ચ બચી જાય અને હાં ભવિષ્યમાં નક્કી નહીં કે એકાદને કૅમેરા ચલાવતા અને એકાદને એડીટીંગ પણ શિખવાડી દે તો ઘરનું જ બધું ગોઠવાય જાય!

        ફિલ્મની વાર્તાનો પ્લોટ ખૂબ સામાન્ય છે. સની દેઓલ સારો માણસ છે અને યુ.કે.માં એક બૅન્કની લોન રીકવરી એજન્ટ તરીકે કામ કરે છે. ધર્મેન્દ્ર અને બોબી બંને ઠગ છે. ધર્મેન્દ્રના હાથમાં બીઝનેસમેન મુરગો એટલે કે અનુ કપૂર ફસાય છે. બંને બાપ દીકરો ભારતના ખૂબ મોટા બીઝનેસ ટાયફૂન્સ બનીને યુ.કે. જાય છે. યુ.કે. જતા જ ખબર પડે છે કે અનુ કપૂરની દીકરી નેહા શર્મા છે એટલે બોબી પટાવવા લાગી જાય છે અને બંનેની સગાઈ થાય છે પણ સની દેઓલ અનુ કપૂરને ત્યાં રીકવરી કરવા જતા તેની ક્લબનો મૅનેજર બની જાય છે. સગાઈ પછી ધર્મેન્દ્ર અને બોબીને ખબર પડે છે કે નેહા અનુ કપૂરની સગી દીકરી નથી અને સગી દીકરી ક્રિષ્ટીના છે. હવે ક્રિષ્ટીનાને પટાવવા માટે બોબીનો એક ભાઈ પણ છે એવું કહીને ’ક્ય” નામ સાથે બીજો બોબી દેઓલ ઇન્ટ્રોડ્યુસ કરવામાં આવે છે.  ધર્મેન્દ્ર-બોબીની ઠગવાની પ્રવૃતિ અને સનીની બચાવવાની પ્રવૃતિ વચ્ચે ચાલતું ફિલ્મ એટલે ’યમલા પગલા દિવાના-2’ પણ આ વચ્ચેની પ્રવૃતિ માટેનો ૧૫૫ મીનીટનો રન ટાઇમ તમને ચોક્કસ પણે વચ્ચે માથાના દુખાવાની ગોળી ખાઈ આવવા પ્રેરશે જ. સંગીત નામે તો હથોડા જ છે. કૉમેડીમાં તમારે મગજ મૂકીને જ જોવાની હોય તો પણ મગજ મૂકવાની એક લીમીટ હોય. સની દેઓલ ૫૦૦ વ્યક્તિઓ સામે એકલો ફાઇટ કરે એ ગળે ઉતારવા તમારે મગજ ખંજવાળવું જ પડે. ચાર સુમો પહેલવાન મળીને આખે આખુ પ્લેન રેડવે, સની દેઓલ એક રાડ પાડે અને ૫૦ જેટલા વ્યક્તિઓ ઘા થઈને દૂર પડે અને એ પણ એવા કે ઊભા થઈ જ ન શકે. સાઉથના ફિલ્મમાં બતાવવામાં આવતી અતિશયોક્તિ કરતા પણ વધારે અતિશયોક્તિ સહન થઈ શકે એમ જ નથી. ટૂંકમાં ફિલ્મ જોવાનું ટાળશો તો એ સમયનો બીજે સારો ઉપયોગ કરી શકશો. સ્ટાર આપવાની હિંમત નથી થતી માટે સ્ટાર આપતો જ નથી.....

પેકઅપ:

"તમારા મૃત્યુ પછી પણ તમે સુંદર છોકરીઓ જોવા માંગતા હો તો નેત્રદાન કરો"